Regimen Belgarum a Natali ad Pascha

Post negotiationes frustra adhuc per sex menses ductas, ab hac septimana vergente habebunt tandem Belgae novum regimen ad interim, cui praesessurus est minister primarius veteris regiminis Guy Verhofstadt (in photographemate).

Adhuc factiones politicae Belgicae non potuerunt novum regimen creare post comitia parlamentaria mense Iunio habita, imprimis ob differentiam opinionum de futuro statu terrae inter Nederlandice loquentes Flandros et Francogallice loquentes Vallones. Agitur hic - explanant rerum Belgicarum periti, ab agentura diurnaria PAP citati - praesertim de modo vectigalia dividendi, nam divitiores Flandri queruntur pecuniam sibi a "pauperibus agricolis Vallonicis" eripi.

Tempore 192 dierum longae "lacunae potestatis" multi iam credebant Belgiam in duas civitates mox se divisuram.

Praeteritis tamen quindecim diebus consensus adeptus est cum coalitionem intrare assensisset francophona factio Christianorum democratarum CDH, cui rei tacite etiam aliae factiones Vallonicae favent, scilicet socialistae (PS) et liberales (MR).

E parte Flandrica coalitionem intraturi sunt victores comitiorum, Christiani democratae (CDV) duce Yves Leterme, necnon liberales ministri primarii Verhofstadt (Open VLD).

Novum regimen ad interim, cui imprimis ratio acceptorum et expensorum anni ineuntis est adoptanda, tantum usque ad Pascha proximi anni valebit. Tunc potestas tradenda est in manus Yves Leterme et... Belgae verisimiliter denuo regimine carebunt.

Scripsit Stanislaus Tekieli