De puerorum caede Afgana

In provincia Paghman, non longe a Kabul capite Afganorum, Saturni die octo homines ab homicida sui interfectore occisi sunt, quorum tres pueri unusque miles fuerunt; novem vero vulneribus patiuntur. Italicos milites pontem exstruentes circumspiciebant nonnulli cives Afgani cum pueris: qui sphaerulis pyrobolo contentis icti sunt, cum sicarius secum mortiferum pyrobolum sub tunica ferens inopinate sese dirupit, cruorem et gemitus circum se diffundens. Iam centum et triginta huius generis facinora in Afganistania hoc anno evenerunt, cum caedes a sui interfectoribus perpetratae fere antea ibi ignorarentur: plerumque copiae et adiutores extranei ita percussi sunt ab extremis islamicis factionibus.

Regimen Italiae iam confirmavit copias (circiter duo milia et quadringentos milites) iamdiu in Afganistaniam a se missas minime domum revocatum iri.

Scripsit Herimannus Novocomensis