Factionem laevam in Slovenia vicisse

Solis die Sloveniae cives ut rei publicae praesidentem longe Daniel Türk (qui in imagine adposita aspicitur) adversario Aloysio Peterle praetulerunt, qui factionis dexterae fautor iam semel praesidens creatus erat: alteri pars laeva magno cum consensu, alteri rector supremus Johannes Jansa favit, cuius consilio tertius tantum quisque assensus est.

Daniel Türk, quinque et quinquaginta annos natum, apud Ordinem Nationum Unitarum operam dedisse constat: cui non modo ante diem X Kalendas Ianuarias magistratus summus in patria continget, sed etiam praesidentatus totius Unionis Europaeae, cum rei publicae Sloveniae munus illud magni momenti per semestre intervallum tribuendum sit.

"Dies festus est hic democratiae" inquit victor, cum profligatus candidatus cladem agnosceret culpam parum populo grato regimini attribuens. Sed Daniel Türk se iam vereri adfirmat, ut difficultates cum rectoribus oriantur oppositae factionis faventibus: se praesidentem talem futurum esse nuntiavit, qui varias politicas condiciones coniungere velit.

Scripsit Herimannus Novocomensis