"Olympia ardet! Adiuvate nos! Vallum flammae appropinquat locis antiquis. Nobis aufugiendumst". Haec verba Christos Giannaras, director musei Olympiaci, in telephonum clamavit. Etiam aedificio Internationalis Commissionis Olympiaci (IOC) imminere flammas.

Post meridiem circa Olympiam actae sunt scaenae dramaticae. Complures burgimagistri vicorum in propinquo sitorum cum SKAI statione radiophonicâ Atheniensi paene desperati telephonantes iterum iterumque auxilium rogitabant: „Flammis circumclusi sumus, egemus siphonariis - vae nobis, tandem agite!"

Quidam incola vici duobus tantum chiliometris ab Olympiâ remoti, cui nomen est Platanos, telephonicê rettulit plerosque incolas e vico aufugisse, reliquos 20 homines ecclesiam iniisse refugium quaerentes. Relator televisorius affirmavit vicum ferê totum combustum esse, vicanos frustrâ exspectasse siphonarios. 12 incolas vici adhuc desiderari

Sed relatores cognovêrunt in locis Oympiae antiquis evitari potuisse „calamitatem permagnam". Molem flammiferam volutam esse praeter instituta Luci Sacri et stadii antiqui et musei. Christos Zachopoulos, Graeci ministerii cultualis secretarius generalis, qui Olympiam properaverat: "Novum museum archaeologicum" inquit „servatum est nec flammis correpta sunt loca Olympiae antiqua. Omnia systemata tutelae incendiariae sunt operata".

Flammae etiam appropinquavêrunt stadio Olympiaco. Praeceptor stadii athletici ab dpa agenturâ nuntiorum dicitur rettulisse systema exstinctorium compluribus hydrobolîs (orig. Wasserkanonen) instructum non operatum esse satis efficaciter, quia flammis destructum esset dividiculum electricitatis (Elektrizitätsverteiler): „Aestimo" praeceptor inquit „e 140 hectareis silvae circa stadion sitae centum hectareas esse combustas."

Politici locales gubernationi Atheniensi obiecêrunt, quod eadem non posset tutari heredium cultûs civilis. Helicopterîgae (Theod. Hubschrauberpiloten) iterum iterumque conabantur flammas cohibêre aquâ marinâ deiciendâ. Nonnullae decuriae siphonariorum et adiutorum voluntariorum vespere pugnabant contra ingens incendium. Locutor siphonariorum monuit periculum nondum esse sublatum neque id brevi fieri posse.

Olympiense autem incendium unum tantummodo est ex quadraginta duobus in Graeciâ saevientibus. A Nicolao Diamandis locutore siphonariorum dimidia ferê pars Graeciae dicitur ardêre. „Istaec revera est calamitas, quanta in Graeciâ numquam fuit antea."

Relatrix radiophonica refert philotheoros desperatos conari omnibus in viis, ubi adhuc possunt vehi autocinetis, Peloponnesum relinquere. Multas autem vias iam esse ab astyphylacibus obsaeptas. "Philotheori autocinetistae" relatrix inquit „Germani Francogalli, Itali et alii circumerrant hanc regionem fumosissimam." Constantinus autem Ladas e vico Kolyri prope Olympiam sito oriundus: "Ubique" inquit „sunt inferna".

In oppido Zacharo, quod nonnullis chiliometris ab urbe Olympiae est remotum, ubi ignis saeviit maximê horribiliter, Achilleas 73 annos natus baculo peragitat cinerem. Hôc loco fuit coquina domûs suae parvae. In angulo stant reliquiae foci gasici exustae. Tectum irruit, in solo iacent trabes ambustae, imbrex tecti (orig. Dachpfanne) fuliginosus. "Omnia" vir inquit animo depresso „perdidi. Hic est finis".

Hae parietinae exustae stant in montibus supra vicum Zacharonem sitîs, mediâ in plagâ lunari, irreali: quantum videri potest, ibi nihil est nisi nigra arborum sceleta, terra obtecta est tapeti cinereo. Flammae hîc iam ante horas exstinctae sunt quia nihil iam fuit, quo ignis aleretur, sed adhuc collem transvolant nubes fumosae. Aëri inest odor incendii amarus.

Usque nunc aestimatum est procellis igneis, quae ex die Veneris in Graeciâ saeviunt, tria ferê milia hominum habitaculis privata esse. Gubernatio Atheniensis hominibus afflictis properê promittit auxilium: omnem hominem habitaculo privatum statim accepturum esse tria milia euronum. Omnem familiam, quae domum suam perdidisset, accepturam esse statim decem milia euronum. „Quid faciam istâ pecuniâ" vetus Achilleas inquit „Domus mea est combusta, arbores eae olivae sunt ad cinerem redactae - quare siphonarii non venêrunt in tempore?"

At siphonarii etiam tertio die istius ecpyrosis infernalis nesciunt, ubi ignis exstinguendus sit primo. Adhuc multa incendia omnino non possunt cohiberi, adhuc mult vici sunt evacuandi, adhuc numerus victimarum exaugetur. Usque nunc incendiis interfecti sunt homines sexaginta. Inter quos sunt septem minimum infantes.

Ignes iterum iterumque reflammantur, quamvis operentur interdum viginti aeroplana exstinctoria (orig. Löschflugzeuge), quae hodie propter ventos mitigatos primo ex die Veneris nonnullis saltim locis denuo potuêrunt volare. Auxilia siphonariiis Graecis allata sunt ab extraneis: Francogalli misêrunt quattuor aeroplana exstinctoria fabricationis „Canadair", quae operata sunt ex diei Dominici tempore postmeridano, vespere e Germaniâ, Bataviâ, Hispaniâ, Italiâ, Serbiâ, Israheliâ, Norvegiâ, Islandiâ alia aeroplana exspectabantur. Etiam Russia et Civitates Unitae praebuêrunt auxilia.

At Graecis siphonariis et militibus, quamvis ab extraneis aeroplanis adiuvarentur, a flammis giganteis circumvallati primo studendum erat defendere vicos periclitantes et homines evacuare, id est hominum vitas servare. Usque nunc fieri non potest, ut siphonarii cohibeant incendia, quorum numerus adhuc est ferê centum.

Nam non solum in Peloponnêso sunt incendia. Etiam in insulâ Euboeâ et in urbe Lagonissi in Athenarum directione australi-orientali sitâ die Dominico flammae saeviêbant. Prope Lamiam in Athenarum directione boreali sitam incendio silvestri inhibitus est commeâtus ferriviarius (orig. Zugverkehr) Graeciae coniunctionis boreali-australis omnium gravissimae. Etiam in Graeciâ boreali flagrabant decuriae ignium.

Interim augentur indicia, quibus appâret incendia dolo facta esse, id est consulto effecta esse ab hominibus incendiariis. Itaque Kostas Karamanlis praeses Graeciae ministerialis iam die Saturni opinatus erat: "Tot incendia fieri simul tot locis, hoc non fieri potest forte fortunâ". Areopoli in urbe vir 65 annos natus ab astyphylacibus comprehensus est, quod in suspicionem vênerat incendii dolo facti, quo sex homines perierant. Locutor siphonariorum dixit illi obici, quod dolo fecisset incendium atque homicidium.

Kavalâ in urbe Graeciae borealis duo iuvenes arrestati sunt, quod putantur incendium doIo effecisse, in insulâ Euboeâ quattuor homines comprehensi sunt, quia per neglegentiam effecissent incendia. Gubernatio Graeca praemia obtulit centum milium vel maximum unius milionis euronum iis dandum, qui astynomis indicia afferat, quibus comprehendantur incendiarii.

In quadam silvâ exustâ prope Athenas sita inventa sunt complura receptacula gasi propani et telephonum mobile ita instructum, ut ad incensionem electronicam posset adhiberi. Die Saturni siphonarii Athenienses intra spatium decem minutarum telephono fraudulenter incendiorum moniti sunt, ut vehicula extinctoria dirigerentur in falsas directiones. Deinde in margine urbis orientali in monte Hymetto ferê simul complura incendia exorta sunt. Nunc astynomi examinant quoddam scopocinêma non-profesionale (Amateurvideo), in quo videantur duo homines prope incendia versantes. Etiam in Peloponnêso siphonarii invenêrunt vestigia incendiorum dolo factorum.

Isti homines incendiarii - suntne mancipes fundorum (orig. Grundstücksspekulanten) lucro insidiantes? An pastores, qui agminibus suis comparare volunt pascua recentia? An incendia effecta sunt negligentiâ? An subsunt, tribus tantum septimanis ante parlamentum eligendum, causae politicae? His quaestionibus usque nunc nihil certi est responsum. Sed in regionibus incendiariis nunc investigant speculatores Graeci officii secreti „EYP" et magistratûs astynomi unitatis antitromocraticae.