De regimine Gallico nuper constituto

Res novae in regimine a praesidente Francogallicorum nuper electo inopinate factae sunt. Nam numerus ministrorum dimidiatus est: quorum unus tantum (Alain Juppé) de rerum natura et de vi generanda necnon de vehiculorum motione acturus est, alius vero (François Fillon) de impensis minuendis. Munus ministri rebus exteris addicti Bernardo Kouchner (quem in imagine aspicis) tributum est, qui societatem beneficam condidit, quae "Medici sine finibus" (Medecins Sans Frontieres) appellatur, et Factionis Socialisticae socius praeclarus est: quem novo officio cognito repente rectores partis eiusdem expulerunt.

Rachida Dati, mulier genus Africana quae Sarkozy candidato ut nuntius proxima fuit, ministra iustitiae erit, res interiores Michèle Alliot-Marie, pristini praesidentis Chirac fidelissimae, committentur. Summatim septem mulieres, octo viri ministrorum sellas occupaturi sunt: nusquam tot feminae in regimine quolubet inveniuntur.

Scripsit Herimannus Novocomensis