Annus
2 0 0 7



Decima vice primus arenas percurrebat

Decima vice primus arenas percurrebat

Decima vice Lahcen Ahansal Marocanus triumphavit in cursu marathonio arenoso (Marathon des Sables), ultimos septem diebus in arenis occidentalis partis Saharae habito. Quo cursu non solum aut currere aut ambulare per arenas cursores, sed etiam ipsi "navigare" scire debent, nam saepissime non est via cursus qualibuslibet signis instructa. Meminisse etiam debemus cursores saepe in pleno sole currere, temperie aeris usque ad 43 gradus Celsianos crescenti.

Ad metam ultimae, "levis" (nam tantum 11,7 chiliometrorum, inter quae 6,3 chm per valla arenosa) partis marathoni Lahcen Ahansal secundus advenit, statim fere (2 minutis 17 secundis) post... fratrem suum Mohamadem. In classificatione generali tamen vicit Lahcen, cunctam distantiam 221 chiliometrorum - in sex partes divisam, quarum difficilima quinta erat, 70 chiliometrorum - tempore 17 horarum 25 minutarum percurrens. Praeter longissimam quintam, in memoria currentium fortasse etiam secunda pars diu manebit, licet 35 "tantum" chiliometrorum - continebat enim longissimam ascensionem montis El Oftal, declivitate media 25%.

Nimirum in altero loco generalis classificationis invenimus supradictum fratrem Lahcen, Mohamedem Ahansal (17 h. 37 m.). Tertius ad metam cursor arenosus quoque "filius deserti", Marocanus est, nomine Aziz el Akad (17 h. 59 m.), quartus autem Hispanus Jorge Aubeso Martinez (17 h. 59 m.). Inter mulieres Francogalla Laurence Fricotteaux triumphavit (23 h. 28 m.)

Cunctim 726 cursores ad metam sextae partis pervenerunt, 31 in via de cursu desistentibus. Quis numerus multo maior est 23 athletis, qui anno 1986 primo matathonio cursu arenoso adfuerunt.

Scripsit Nanompouphos



Retro ad:

Novissima editio
Summum paginae