De Antoni Blair difficultatibus in senatu inferiore

Etsi maior pars senatorum armis atomicis renovandis favit, minister primarius Britannorum (quem in imagine conspicis) gravem cladem in senatu inferiore accepit: nam nonaginta circiter senatores laboristici consensum suum regiminis consilio denegaverunt. Similiter ante quadriennium aliquot laboristae contra bellum Iraquicum suffragati erant.

Antonius Blair hoc in animo habet: arma nuclearia renovare, quintum quodque caput iaculatorium amovere, nova vero navigia submarina ad missilia "Trident" eicienda exstruere, XX milium milionum librarum pretio. Sed totius armorum renovationis pretium quintuplum erit, si omnes structuras et onera computaveris. Qua pecuniae immani vi laevae partis oppositores longe aliter utendum esse putant

Dux liberalistarum senatorum Menzies Campbell regimen partis suae fidem amisisse dixit: nam magis magisque Antonio Blair favor sociorum suorum deest, qui se officio se abdicaturum esse recenter nuntiavit, ut sellam summam ministro aerario Gordon Brown addicto tradat.

Scripsit Herimannus Novocomensis