Lis ministri primarii Kosoviae

Ad Hagense Tribunal criminibus in pristina Iugoslavia committis investigandis adductus est 38 annorum Ramush Haradinaj, olim minister primarius Kosoviae, internecionis civium Serborum et Zingarorum tempore insurectionis Albanorum in hac pristina provincia autonoma Serbiae annis 1998-99 peractae accusatus. Qui Haradinaj - praeter defunctum praeterito mense Martio pristinum praesidentem Serbiae Slobodanem Milosevic - maximo munere publico est homo umquam a iudicibus Tribunalis Hagensis in iudicium commissus.

Ut dixit primo die litis iudex principalis huius tribunalis Carla del Ponte, Haradinaj, tunc dux agminis militum clandestinorum Albanensis, sicut simul cum eo in ius adducti avunculus eius Lahi Brahimaj necnon alius dux agminis militum clandestinorum Idriz Balaj, manus cruore innocentium civium valde maculatas habeant. Haradinaj accusatus est non solum iussa internecionis dedisse, sed etiam ipsius manibus Serbis et Zingaris cruciata necnon mortem adhibuisse, qua re - ita saltem del Ponte - magna cum voluptate fruebar.

Anno 2005 officialiter a Tribunale Hagensi accusatus Haradinaj, tunc modo electus ad munus ministri primarii Kosoviae (sive Latinius: Campi Merulei), statim munus novum deposuit et sua sponte in carcerem Scheveningen ad Hagam Comitum advenit. Quod sine dubio fecit, ne quid detrimenti civitas novissima Kosovarum in arena diplomatica caperet.

Ipse Haradinaj negat se aliquid fecisse 37 contra eum adductarum exprobrationum. A suis ut heros honoratur.

Scripsit Nanompouphos