GENIUS

In hac pellicula praeclarae vitae scriptoris Thomas Wolfe et editoris Max Perkins narrantur

GENIUS USA 2016

Dispositor scaenarum: Michael Grandage. Histriones maximi momenti: Colin Firth, Jude Law, Nicole Kidman, Laura Linney, Guy Pearce.

Vir negotiosus peritus libros edendi adversus fabularum scriptorem: hoc in summa res est pelliculae dispositoris scaenarum Michael Grandage, in qua pares Colin Firth et Jude Law primas partes agunt.

Fabula sumpta ex vitae descriptione ab A. Scott Berg exarata (“Max Perkins: editor of Genius”), Novi Eboraci exeunte tertio decennio vicesimi saeculi initium habet. Maximus Perkins (Colin Firth) editor princeps domus editoriae magni momenti (Scribner’s Son) apud quam Franciscus Scott Fitzgerald et Hernestus Hemingway famam sibi comparaverant, ineunte anno MCMXXIX ignotum scriptorem Thomam Wolfe convenit secum magnum opus (“O deerrans”) circiter mille paginarum afferentem. Statim Maximus genere narrandi novi scriptoris allectus est; magno studio utriusque quodam numero foliorum fabula nudata est ut editioni apta esset: tandem opus, mutato titulo in “Praeteritum tempus inspice, Angele” optimum eventum habuit. Assiduo labore etiam altera fabula c.t.e.“Temporis flumen” multo maior, imminuta est magno plausu edita. Deinde Thomas Wolfe quadam inquietudine captus, derelicta muliere et editore, multa loca pervagatus, immaturam mortem obiit. Accepta postrema epistula scriptoris gravissime aegroti, magno maerore confectus , editor petasum, numquam ablatum, ne apud mensam quidem, a capite tollit.

Fabula non tantum ad scriptorem ingeniosum et immoderatum, quasi novum patrem petentem, spectat, sed praesertim ad editorem qui, neglecta saepe familia, opere adeo captus est, ut totum se ei det: nam genius non sufficit, editionis curatore opus est ut liber feliciter venum eat. Et peritia histrionum et res vera animos spectatores movent et alliciunt, cum vitae scriptoris et editoris narrentur et quid antequam liber publicatus sit fieri necesse.

Scripsit Lydia Ariminensis