Aetas mediaevalis denuone revertitur in Europa?

Antequam Imperium Romanum Occidentale anno 476 corrueret, barbarae tribus iam Imperii fines transire coeperant, non ut id delerent sed quod prosperitas et clima eas alliciebant; tamen ut notum est, barbari tandem Imperium deleverunt et Aetas Mediaevalis coepit. In causis numerantur praeter barbaros fere haec: delinquentes sive legum effractores irrefrenati agebant; nulla de pactionibus fide servata; senatores et consules et reliqui magistratus consilia apta ad imperium servandum nulla excogitabant; oeconomia quae fuerat antea e regionibus integrata et merces importabantur atque exportabantur, postea periculosis itineribus omnia bona uno loco gignebantur et consumebantur, indeque feudale regimen ubique instituebatur.

Potestne fieri ut nostris temporibus Europa denuo in Aetatem Mediaevalem incidat? Quamquam historia non semper iteratur, tamen aliquae res in serie temporum videntur per intervalla etiam atque etiam patere; itaque nunc aspici possunt in Europa quaedam condiciones, quae rerum Mediaevalium recordationem nobis afferunt. Politici Europam in summum discrimen fere duodecim annos abhinc impulerunt; Unionem mirificam futuram euronemque in mercatu optimum esse saepe populis dixerunt.

Unio Europaea creata est ut liberi commercii zona fieret, itemque ut inter Germaniam et Francogalliam servaretur stabilis pax; at nunc agitur de malefica certatio ut potestates in unum redigantur et cives minus nimusque facultates exerceant de vita sua. Unionis conditores, qui fuerunt Adenauer Germanus et Schuman Francogallus et Gasperi Italus desiderabant Europam in libertate degentem ubi omnis natio sui iuris esset et civibus libertatem servarent, adeo ut mercatus quam optime fungeretur; haec omnia in Foedere Romano anno 1957 statuta sunt.

Sed erat etiam illis diebus alterum propositum, nempe socialisticum, cui Delors et Mitterand favebant; ex eo Unio Europaea fieri deberet Status magnus hominum protectivus et rerum oeconomicarum interventivus et potestates in unum cogens, technocratis gubernatus, ita ut sumptibus fiscalibus omnes incolae et advenae beneficia adipiscerentur; hoc propositum paulatim praevaluit adeo ut cives interesse minime possunt in iis rebus quae Bruxellis hodie aguntur. Commissio Europaea, quae Potestatem Executivam exercet, non suffragio populari eligitur sed ab Unionis nationibus quarum politici et auctoritates vestibularios sive lobbistas plerumque exaudiunt.

Europaei de eurone non rogati sunt; hic autem nummus populis impositus est a vestibulariis qui ex amplis commodis oeconomicis proveniunt. Suetia et Dania plebiscitis euronem refellerunt, adversantes primoribus industrialibus et syndicalibus et partim politicis. Constitutionem Europaeam Francogallia et Nederlandia plebiscitis refellerunt sed postea politici eam sub foederis forma et alio nomine Olisippone anno 2007 probaverunt.

Quaedam pristinae Unionis pacta (vel nulla oeconomica redemptio pro nationibus improbe gubernatis vel expensis fiscalibus limites) hodie minime servantur; in Germania omnes migrantes possunt beneficia sive subsidia adipisci; delicta in Europa magnopere augent propterea quod sub migrantium nomine legun effractores ingrediuntur, vix nulla in terminis recognitione facta; multi migrantes, qui mulieres contemnunt, in viis fere cottidie sexualiter

oppugnant, nec desunt tromocrates qui Status Islamici doctrinam colunt; summatim: Europa ad collapsum et ruinam ocius citius progreditur; haec ruina non erit pugna neque bellum, ut olim factum est, sed erit vitalium condicionum detrimentum necnon humanitatis ac libertatis; quapropter ne Aetatis Madiae immemores simus.

Scripsit Paulus Kangiser