NATALIS CRUORE ASPERSUS

Automatum onerarium in multitudinem incurrens magnam caedem Berolini effecit

Non solum Aleppi hoc tempore flumen sanguinis fluit. Quid dicam de legato Russico Andrey Karlov Ancyrae necato coram coetum a biocolyta Syriae ultore, dum orator apud expositionem photographicam sermonem habet?

Sed quiddam atrocius factum est. Ante octo dies sub vesperum magnum automatum onerarium (tir) vectori Polono ablatum in forum parvum natalicium Berolini (Breitscheidplatz) inter multitudinem incurrit: duodecim perierunt; plurimi sauciati. Inter mortuos etiam femina Italica triginta unius annorum c.n.e. Fabrizia Di Lorenzo, quae ad operam dandam in urbem migraverat.

Statim similitudo cum petitione tromocratica Nicaeae praeterita aestate effecta apparuit. Vector Polonus mortuus nomine Lukasz Urban, triginta septem annorum, qui ab Italia profectus erat ut onus contabulationum Berolinum transportaret, avertere territoris iter quoquo modo conatus est: nam cultro percussus et glandibus sauciatus prope exanimis cum petitore contendit. Dimisso Pakistano qui primum comprehensus erat, ex documentis sub vectoris subsellio inventis custodes publicae securitatis Tunisensem viginti quattuor annorum inquirere coeperunt qui plura nomina sibi tribuerat. Post tres dies apud Mediolanum in Italia Septentrionali petitor nomine Anis Amri in proelio cum custodibus publicis necatus est. A Francogallia tramine vectus pervenerat, sed cum a statione ferriviaria exisset, in inspectionem biocolytarum incurrit; statim arma ignivoma displosit et unum eorum sauciavit; alter biocolyta territorem occidit. Ab impressione digitali et vultus mensuris agnitus est.

Quomodo Anis Amri tanto scelere investigatus tam facile egredi a Germania, ingredi in Francogalliam et Italiam potuit? De hac re vulgi opinio custodes publicos reprehendit.

Scripsit Lydia Ariminensis