DE RECTORIBUS FACTIONIS CURDARUM  IN TURCIA COMPREHENSIS

Magna perturbatio in Turcia exorta est cum in custodiam principes  factionis moderatae Hdp missi essent

Die Veneris intempesta  nocte in Turcia rector partium Curdis (Hdp) faventium Selahattin Demirtas et eius vicaria  Figen Yuksekdag, qui  sunt participes senatus legationisque popularis, comprehensi sunt. Cum rectoribus  etiam alii decem legati ferendis legibus eiusdem factionis in carcerem ducebantur. Paulo post  diruptio pyroboli effecta est in urbe capite Curdarum Diyarbakir contra biocolytarum stationem qua  octo perierunt et prope centum vulnerati; sub vesperum petitio a  Chalifato vindicata est, quamvis etiam factio territorum pro Curdis (Pkk) interfuisse ferretur.  

Comprehensiones uno eodemque tempore in variis provinciis factae sunt incepta indagatione a mense Augusto de factione tromocratica Pkkn ob quam ambo rectores, recusantes, cum legati populi essent, in ius vocati erant; tamen iam a mense Maio senatus legatioque popularis decreverat ut immunitas  ad legatos populares spectans eis auferretur qui de tromocratia accusarentur.  Plurimi praesenserant legem ad Demirtas conversum iri.

Custodes publici domum  moderatoris Demirtas in urbe Diyarbakir inquisiverant, simulque idem de vicaria  Ancyrae factum est; iis comprehensis cum ceteris legatis proelia inter Curdas et biocolytas  praesertim in urbe natali ducis exorta sunt.  Postea pyrobolus displosus est. Interea instrumenta communicationis socialis( facebook, youtube, twitter, whatsapp, instagram)  intermissa erant vel fortiter minuta: quod “indicium horrendum” ab auctoritabus Unionis Europaeae dictum est, id est democratiae finis.

Scripsit Lydia Ariminensis