RIXA VERBALIS INTER CANDIDATOS PRAESIDIALES

Donaldus Trump et Hillary Clinton mutuis accusationibus in trasmissione televisifica vehementer contenderunt

Prima contentione habita de comitiis ad munus praesidiale Civitatum Americae Unitarum, Hilaria Clinton candidata factionis democraticae, victrix exstiterat, ex secunda par ac adversaria Donaldus Trump discessit, qui tamen se reficere voluisset de priore clade, nihilo minus de defectione consensus eorum qui suffragia laturi sunt. Sed exaequare petitori conservativo non sufficit qui ex opinionum exploratione a quattuordecim diebus in via declivi est. Praeterea certamen extenuatum est tenia visifica anni MMV, qua Trump feminas in partibus pudendis gloriatur se manibus attrectare: nam flagitium omnium animos occupavit, prope neglecta pugna inter candidatos. Incepta controversia, in crimen vocatus, veniam petiit, sed postea sua verba ineptias in apodyterio virorum expressas aestimavit. Non tamen devictus accusationes contra adversariam reiecit: illam peiora egisse, cum feminas laesisset a viro praeside subiectas. Disputatum est de vectigalibus, de vi energetica, de rebus exteris, sed criminationes in animis spectatorum insculptae sunt: Trump vehementissime Hilariam minatus est: se praeside in iudicium illam vocatum iri ob nuntios secretos vulgatos (wikileaks); invicem Hilaria Clinton confessa est se fefellisse cum privatum cursum electronicum adhibuisset pro publico, quamvis munera secreta Russica de rebus effusis accusaret. Etiam mutuae laudes veneno imbutae sunt: Hilaria dixit se familiam et filios aemuli vereri, vectigalia significans, Donaldus eam pugnantem descripsit, quae nemini cederet. Exeunte altero certamine, dextera inter eos non iuncta est, secus quam priore.

Scripsit Lydia Ariminensis