DE PUERO SYRO E RUINIS VIVO EXTRACTO

Hoc tempore per interrete imago quae excidii bellici signum in urbe Syriaca Beroea (Halab) perpetrati existimatur vulgata est: puer octo annorum servatus ab hominibus “galeis albis” Syris, qui a triennio, inter domos dirutas cadis coniectis instar pyrobolorum replenis trinitrotolo et metallorum fragmentis, manibus effodere solent. Humana facinora eo graviora facta sunt quo maiores actus belli, cum pyrobolariis regiminis ducis Assad Russici adiuncti essent ab Irania profecti ut partem orientalem urbis a rebellibus subactam quaterent. Omar Daqnish a voluntario Syriae Defensionis Civilis sinu et complexu receptus est et in arceram allatus: ibi sessus puer vulnus in capite tangit, aspectu est obstupefactus, nimium attonitus flere nequit, a sinistro oculo sanguinem effundit, toto corpore pulvere sparsus est. Nunc iam cum parentibus est, cum nullum vulnus mortiferum ei allatum sit. Una cum ceteris pueris usque ad quintum decimum annum aetate curatus est in nosocomio sub terra posito: XXXV medici tantum manserunt, cum cives tria centena milia sint. Taeniam visificam et imaginem retentam Centrum Mediale urbis Beroeae vulgavit.

Per hunc puerum spes est in toto orbe attentionem animorum ad bellum Syriacum verti posse ut pars territorii pro civibus a petitionibis aëriis defendatur; re vera etiam de indutiis consensus deest; timor est ne imago miserabilis oblivioni detur.

Scripsit Lydia Ariminensis