CAEDES ET TERROR MONACHII

Heri post meridiem Monachium in terrorem incidit. Ante cauponam ubi isicia Hamburgensia venduntur adulescens, nomine Ali Sonboly , prope puer aetate et specie, Theodiscus ab Irania oriundus, pistolio displodere coepit in multitudinem: in sacciperio dorsuali trecentas glandes celabat. Deinde caeco impetu inter tabernas pantopolii apud Hortum Olympiacum ictus emisit; paulo post sibi ipse mortem conscivit; in summa novem mortui sunt, quorum quattuor minore aetate, praeter sicarium, et sedecim graviter vulnerati. Per interrete in eum locum adulescentes puerosque convocaverat , cibo gratuito promisso. Per octo horas urbs pavore capta est, praesertim cum primo putarentur tres esse petitores etiamque socii Chalifi (ISIS).

Humili loco natus, pater rector autocineti meritorii est, mater adiutrix mercatoris; ipse qui reputabatur a finitimis quietus, renuntiavit paulo post caedem, ut repertum est in tenia visifica, se, oppressum ab aequalibus per septennium, ulcisci voluisse. Adulescens solitarius, in aegrimonia versans a psychiatra curabatur; lusis studebat quibus per computatrum fictas caedes conficiebat. In cubiculo documenta de stragibus inventa sunt, quarum prior effecta in oppido Winneden, non longe a Stutgardia anno MMIX, altera apud Nutoya, in Norvegia, ab Anders Breivik ante VI annos perpetrata. Liber autem inventus est cuius titulus haud ambiguus “Furia in capite: cur discipuli occidant”. Nemo providerat in eo tantam vim latere, quamquam mortem condiscipulis minatus erat.

Scripsit Lydia Ariminensis