LEGISLATRIX POPULARIS ANGLICA NECATA EST

Helena Johanna Cox, legata popularis factionis laboristae, quadragesimum secundum annum agens, ad portas urbis Leeds in Comitatu Eboraci efferate occisa est. Primum cultri ictibus, deinde telis igniferis percussa est. Auxilio dato, cum esset graviter vulnerata, paulo post in nosocomio mortem occubuit. Incola loci, nomine Thomas Mair, quiquaginta duorum annorum, a biocolytis comprehensus est qui, affectus quadam animi perturbatione, sese operis praecariis sustentans, ex nuntiis instrumentorum communicationis, antequam scelus perfecit, fertur clamavisse: “In primis Britannia” ( Britain First), qua sententia factio dexterae extremae nominatur.

Nemo dubitat quin deputata popularis suis opinionibus occisa sit: antea quaestionibus de bello Syriaco et migratoribus se tradidit, acceptioni favit; obstitit autem ne Britannia ab Unione Europaea exiret. In pagina breviloquenti (Twitter) primum sub sua effigie scripserat: “Transmigratio cura legitima est, tamen recta causa non est cur Europa relinquatur”.

Post exitiales insidias duae factiones ex adverso positae in plebis scito diei 23 mensis Iunii de Britanniae exitu ab Unione Europaea, inter se pugnare in praesens intermiserunt. Tota natio pertubata est; “Res” -inquit Minister Primarius Cameron – “vere tragica exstitit”.

Scripsit Lydia Ariminensis