MAXIMUS PUGIL OMNIUM TEMPORUM MORTUUS EST

Ante quadriduum Muhammad Ali, cui nomen antequam ad religionem Mahometi se convertisset Cassius Marcellus Clay fuerat, septuagesimo quinto aetatis anno, morbo Parkinsoniano obiit. “Cor palpitavit semihoram” inquit filia “postquam ceterae partes non iam suo munere fungebantur”. Usque ad extremum tempus suo more contra fatum proeliatus est. Ob victorias tot certaminum pugilum recte Maximus (The Greatest) cognominatus est: praecipue memorabilia tria certamina manserunt contra acerrimos emulos Joe Frazier et Georgium Foreman qui ante septennium ei praestiterat. Non praetermitti potest quin septimo decennio prioris saeculi etiam imago motus pro iuribus nigrocolorum fuerit, cum Nigrae Potestatis (Black Power) sectator esset. Anno MCMLXVII administrationi Civitatum Americae Unitarum obstitit, cum recusavisset ne ad bellum in Vietnamiam, tamquam repugnator religionis causa, conscriberetur. Qua re in crimen vocatus quod militiam detrectavisset, parumper in vincula coniectus, maxima gloria certaminum ei ablata est; tamen Summum Tribunal anno MCMLXXI poenam abrogavit. Anno MCMLXXIV celeberrimum certamen in re publica Zaire consertum est nominatum “Rixa in silva” (“Rumble in the Jungle”), quo Muhammad Ali magno cum strepitu et praeter exspectationem Georgium Foreman superavit.

Decennio transacto ab hac victoria, morbum Parkinsonianum contraxit; dum taeda accenditur in ludis Olympiis Atlantae anno MCMXCVI tremor eius manuum toti orbi aegrotationem ostendit. Ultimo vitae tempore vix spirabat. Phoenice, in Arizona mortuus est, sed exsequiae postero die X mense Iunio in urbe Louisville, eius terra natali, in civitate Kentucky celebrabuntur. Valde commotus Georgius Foreman eum commemoravit: “Ego, Ali e Frazier unum eramus; pars maxima mei obiit”.

Scripsit Lydia Ariminensis