DE SAEPIMENTO EXSTRUENDO INTER AUSTRIAM ET ITALIAM

Iam priore mense Septembri Austria Europam edocuerat recognitiones ad tempus apud omnes fines factum iri; mense Octobri rete apud finem Dalmatiae positum est eodemque modo, fracto foedere Schengen, transitus per regiones Balcanicas conclusi sunt. Ante biduum in via autocinetica quae ad Austriam fert apud saltum Brenneri munimentum orbitae (guardrail) ablatum est ut saepimentum metallicum struatur quod ab Italia eam seiungat. Constructio in longitudinem CCL metra patebit; et viam autocineticam et publicam transibit.

De hac re praefectus immigrationi curandae Demetrius Avramopulos apud totum senatum Europaeum locutus est: se putare opus esse pontibus, non muris: immigrationem adeo administrandam esse ut non fidem pactionis Schengen rumperetur. Vitandum esse quod accideret apud oppidum Eidomenen, rem turpem et Europae historia indignam. Austriae auctoritates fortiter consilium defendunt: in Europam migrantes inituros attente inspiciendos esse. Mercaturam et transitus liberos mansuros esse. Administra rebus domesticis praeposita Johanna Mikl-Leitner timet ne mox ter centena milia profugorum In Italiam perveniant et omnes per saltum Brenneri transeant.

Ab Avramopulos Administer Italicus Paulus Gentiloni praepositus negotiis exteris et Angelinus Alfano rebus domesticis requisiverunt ut mox cognoscerent num consilium Austriae cum principiis necessitatis, aequalitatis et sincerii auxilii ex foedere Schengen congrueret.

Scripsit Lydia Ariminensis