DUPLEX INCURSIO TROMOCRATICA BRUXELLIS FACTA EST

Hodie mane duae diruptiones atrium profectionum aëriportus oppidi Zaventem concusserunt, qui maxima statio capitis Belgii exstat esse, XV kiliometra a media urbe absens : sanguis ubicumque sparsus, membra discerpta, lacunar atrii ex parte labefactum. Pyroboli etiam clavos cohibebant. Nec dubium est quin petitio territorum fuerit , cum clamor Arabice et crepitus armorum, ante diruptionem auditi sint. Imago filmica duos suspectos carrulos moventes ostendunt, qui sui interemptores reputantur, pyrobolos ferentes. Hic XIV saltem perierunt, LXXXI sauciati sunt. Pyrobolorum diruptores fascem dubium invenerunt ac disploserunt, tertium machinamentum existimatum , quod nihil effecerat. Alii quinque suspecti in urbe quaeruntur, sed ex biocolytarum sententia, non omnes territores ex aëriportu evaserunt.

XX mortui et centum vulnerati computati sunt post alterum impetum apud hamaxostichum subterraneum Maalbeck, non longe a Consilio Europaeo, ubi tertius pyrobolus dirupit. Hic multi adhuc intercluduntur. Statio aëriportus conclusa est; multa milia viatorum in curriculum aëronavium amoti sunt, dum circum undique biocolytarum magna copia consistit. Statio ferriviaria conclusa est. Tota urbs a custodibus publicis et exercitu munitur, frequentia viarum intercluditur. Multa loca ac aedificia vacua facta sunt.

Priore die Veneris Salah Abdeslam unus machinatorum caedis Lutetiae Parisiorum, Bruxellis comprehensus est: auctoritates Belgicae incursus tromocratarum ut refutationem suspicabantur. In interreti fautores Chalifi Abu Bakr al Baghdadi petitiones hodierno die comprehensionem eiusdem ulcisci renuntiaverunt.

Scripsit Lydia Ariminensis