PRAECLARUS SCRIPTOR HUMBERTUS ECO MORTUUS EST

Die prioris Veneris (19 mense Februario), vespere, praeclarus scriptor, philosophus, semiologus, professor universitatis, toto orbe cognitus, Humbertus Eco, anno octogesimo quinto aetatis domi suae Mediolani e vita excessit. Die Martis exsequiae civiles in eadem urbe fient. Sexaginta annos ad praesentia cultum civilem Italicum accomodavit ac mutavit, sed extra Italiam eius magna fama a fabula “Nomen rosae” exorta est, edita in anno MCMLXXX, in tot sermones conversa, plurimum divendita. Sed ipse maxime semiologiam pervulgavit et docuit, de qua disciplina multa opera tractant (“Disputatio de disciplina semiotica”, “Ephemeris minima”, “Structura absens”, “Lector in fabula” cum titulo Latine scripto). Eius doctrina penitus litterarum et artium exploratio renovata est. Lector intimum colloquium cum opere serit ex contextu quo vivit, ex suae vitae vicibus, ex suo cultu civili. Tamen ita faciens nullo modo infidelem auctori se praebet, sed dialectice conectitur cum eo, in medio stat inter veritatem et libertatem. Significatio operis, de industria anceps, eos qui illo fruuntur excitat ita ut se quisque de sensu primum interroget, deinde, more Socratico, verum inquirat.

Legere reputavit magni momenti esse. De qua re saepe discipulos monuit. “De quacumque re instrumenta communicationis socialis nunc agunt, hoc universitas studiorum iam abhinc viginti annos egit et de quacumque re nunc universitas studiorum agit post viginti annos ab instrumentis communicationis socialis hoc referetur. Totum se in litteris abdere apud universitatem valet ante viginti annos advenire . Eadem est causa quapropter legere didicisse vitam longiorem reddit. Qui minime legit, ei una vita est, quae, hoc vobis confirmo, brevissima est. Nos autem cum morituri erimus, meminerimus nos Rubiconem cum Caesare transisse, itinera fecisse cum Gulliver et nanos gigantesque convenisse. Parva remuneratio pro aeternitate absenti. Omina fausta vobis exopto!” Sumptum a sermone habito pro discipulis tironibus Scientiarum Communicationis Universitatis Studiorum Bononiae anno MMIX.

Ut finem rei faciam, ille scripsit in Postilla fabulae “Nomen rosae”: “…libri alios libros revocant et omnis fabula fabulam narrat iam narratam..”

Scripsit Lydia Ariminensis