DE STATUIS NUDIS IN CAPITOLIO OPERTIS

Magna exprobratio excitata est toto orbe praeclaris statuis nudis opertis in Musaeo Capitolino Romano dum Praeses Iraniae Hassan Rohani in aula Exedra Ministrum Primarium Matthaëum Renzi convenit qui serius incommodum in medium protulit. De qua re factiones adversae sed etiam Administer Bonis Cultus Humani praepositus Darius Franceschini questi sunt.

Cur hoc factum est, quod bracas evocat quibus ante nonnulla saecula imagines nudae artificis Michelangeli Buonarroti tempore Ecclesiae morum correctionis et emendationis vestitae sunt? Nihil huiusmodi apud Palatium Quirinalis evenit ubi Praeses Persarum Hassan Rohani cum Praeside rei publicae Italicae Sergio Mattarella eodem die Lunae ad colloquium venerat; nihil in colloquio cum ipso Pontifice, quocum de pace die Martis disseruit. Legati Persici, facta recognitione in Musaeo Capitolino, petierunt ut causae “marmoreae” conturbantes occultarentur, equusque Marci Aurelii admotus est ne pudenda hospiti ostenderet. Aulicus apparatus, ut videtur, consensu legationis Italicae, commode postulatis indulsit, iniussu auctoritatis rei publicae.

Quae simulacra tecta sunt? Inter alia Venus Capitolina, Leda cum cycno, Dionysus, raptus Sabinarum, praeclara pulchritudinis exemplaria, historiae Romanae coniuncta. Cur tot reclamationes a toto orbe? Sunt qui putent labem cultus humani Europae fuisse erga aliorum mores. Num vera reverentia cultus alieni existimanda est sui cultus abdicatio? Contentio magis magisque augetur. Quid dicam? Negotia maioris momenti sunt quam pulchritudo et patriae historia.

Scripsit Lydia Ariminensis