FINES SAEPTI FINIS LIBERI CURSUS IN EUROPA

Nuper Minister Primarius Illiriae (Republika Slovenija) Miro Cerar mox consilia captum iri nuntiavit ut finis Illiricus ante Liburniam coerceatur. Collegium virorum Austriae, Germaniae et Illiriae nunc explorat quomodo hic terminus maximi momenti iis qui a Graecia in Europam ineant, firmari possit. In summa Germania, Suetia, Norvegia, Dania, Austria praeter Francogalliam post territorum incursus, quodammodo libertatem iter faciendi minuerunt vel ad tempus intermiserunt. Nondum foedus pactum ante XX annos in oppido Schengen abrogatum est: nam in capitibus XXIII, XXIV, XXV intermissio statuta est discrimine imminente intus vel extra, nisi fines defenderentur.

Maxime interest igitur ut confinia externa custodiantur. Nisi hoc fiat, periculum est ne intermissio brevis stabilis permaneat. Foedere dilapso etiam timendum est ne mercatura communis et euronummus deficiant.

Collegium Europaeum Bruxellae faventibus Germania et Francogallia consilium paravit de custodia Europaea instituenda ut fines et litora defendantur extra uniuscuiusque rei publicae potestatem. Ergo foedus Schengenianum adhuc vivit, non bona valetudine utitur.

Scripsit Lydia Ariminensis