Plura inspici possunt in sede interretiali ferigoletensi www.frigolet.com (sive in lingua franco-gallica sive in lingua latina).

Segedini, in Hungaria, inde a die XXIV mensis Iulii usque ad Kalendas Augustas a. MMVIII; Adulescentuli et iuvenes iam inde a die XXII invitantur ad praevias sessiones celebrandas.

Peracto Neapoli superiore aestate conventu HVMANITAS nuncupato, apparitores, felici conventus successu incitati, ordinare statuerunt, una cum amicis collegisque Hungaris, seminaria quaedam Latina, aestate hac proxima Segedini in inclita Hungariae urbe habenda. Quae seminaria inde a die vicesimo quinto mensis Iulii ad Kalendas usque Augustas, sub nomine quod est "LITTERARVM VIS", celebrabuntur; ita tamen ut iuvenes die vicesimo altero Iulii eodem iam congregentur, ut a peritioribus per biduum usu sermonis Latini extemporali initiari queant. Ad haec seminaria participanda ii omnes vocantur, qui humanitatis studiis addicti de iisdem cum praeceptoribus ac condiscipulis sermocinari disputare deliberare cupiant.

Argumenta tractanda erunt maxime varia, sicut varia est vis quam litterae exercent; participes igitur verba facient de artibus deque Musis omnibus, quae modo excitant modo sedant animi affectus; de vita civili deque arte rhetorica, qua bonus vir cum dicendi peritus tum publici boni defensor fit; de rerum denique gestarum historia deque pueris instituendis, qui virtutum vitiorumque aetatis suae magis sibi conscii fiunt si ea cum moribus institutisque praeteritorum temporum comparant. Quia pleni omnes sunt libri, plenae sapientium voces, plena exemplorum vetustas: quae iacerent in tenebris omnia, nisi litterarum lumen accederet: nam haec studia adulescentiam alunt, senectutem oblectant, secundas res ornant, adversis perfugium ac solacium praebent, delectant domi, non impediunt foris, pernoctant nobiscum, peregrinantur, rusticantur.

www.litterarumvis.eu

1. Certamen indictum est, quo vinum Barbera et deus Bacchus Latino sermone celebrentur. Certamen omnium gentium commune est: quivis potest in id descendere, sive discipulus, sive litteratus, sive Latini sermonis amator, ubicumque terrarum vitam suam agit.
2. Certamen, cui Barbera domina vinorum – Laus Bacchi nomen inditum est, ex commentatione Latina aut soluta oratione aut versibus conscripta constat.
3. Ei, qui certamini interesse vult, una tantum commentatio producenda est, quae nondum edita esse debet.
4. Commentationes computatro conscribendae sunt; uti uno latere paginae usitatae formae oportet, quae signo A4 vulgo notatur.
5. Commentationes Bibliothecae municipali vel Administrationi Casteniolae, quod municipium italice Castagnole delle Lanze nuncupatur, mittendae sunt; domicilia infra satis copiose scripta invenies. Cum opus mittes, nec nomen tuum neque in involucro neque in commentatione ipsa scribito. Agnomen contra ψευδωνύμως scribito et in commentatione et in minore involucro, in quo condideris quod nomen praenomenque vere tibi sit, ubi habites et quando natus sis. His rebus confectis, opus tuum mittito ante diem statutam, quae est postridie Non. Apr. anni MMVIII.
6. Qui competitores digni sint qui ad certamen admittantur et qui praemio afficiantur arbitri statuent. Iudicium arbitrorum – qui viri mulieresque doctissimi sunt, Latini sermonis Latinarumque litterarum peritissimi - nullo modo reprehendi vel flecti licebit.
7. Commentationes admissae in Bibliothecae potestate manebunt, cui ius eas suis impensis edendi erit. Non licebit auctore invito commentationibus aliter uti.
8. Commentationes missae non reddentur et edi poterunt.
9. Is, qui in hoc certamen descendere vult, omnibus superioribus legibus plane adsentiri debet.

http://www.comune.castagnoledellelanze.at.it

Pater Caelestis mortuus est

Pater Caelestis Eichenseer OSB, natione Germanus et summus Latinitatis cultor atque adsertor acerrimus, die quarto Febr. mortuus est.

Pater Caelestis (vulgo Joseph Anton Eichenseer), natus 1 Iulii 1924 , monachus Benedictinus et theologiae doctor, multos annos operabatur apud Universitatem Saravianam Saravi Ponti. Conditor et editor fuit commentariorum Vox Latina. Multos libros edidit et innumerabilia seminaria neolatina duxit.

Omnes cultores Latinitatis vivae lugent. Eximium linguae Latinae decus et propugnaculum amisimus!

Requiescat in pace.