QUID SIT ITALICUM, QUID RECENTISSIME PRESSUM

Oleum naribus linguaeque cognoscere...

Viginti (20) biocolytae Itali primi scholam reliquerunt verum oleum olearum olfaciendo gustandoque recognoscendi, ne plus olivum e terris vicinis subintroducatur, quod deinde venum detur ut verum oleum olearum Italicum ac recentissime pressum (extra-virgin). Tale enim oleum a multis in mundo guastatores putatur ut optimum omnium, licet maxima fabricatrix olivi in orbe terrarum non Italia, sed Hispania sit - nuntiat ephemeris Britannica "Telegraph".

Fabricatio olei Italici decidit proximo praeterito (2007) anno 15 centesimis, cum eodem tempore importatio olivi e terris vicinis - ut Hispania, Graecia aut Tunisia - auxisse reportetur 12%. Magistratus suspectant magnam partem olei "Italici recentissime pressi", quod et in hac terra et peregre vendatur, re vera non ex olivetis Italiae originem duxisse, a subintroductoribus advectum, praecipue quod lustrationem autoplaustrorum in limitibus inter terras Unionis Europaeae a teloniariis nunc esse nullam. Remanent ergo tantum nares gustatusque biocolytarum.

At boni gustatores semper alienigenum oleum recognoscant. Ita, exempli gratia, oleum Hispanicum semper paululum sapiat coriandro - ita saltem dicit Sabine Hills, Britanna emptrix, quae in mercatu olei Italici iam 26 annos versata est.

Praeterito mense Martis biocolytae Itali apprehenderunt 23 homines et clauserunt 85 oliveta, quae subintroductoribus adiuvarent. Aprili autem mense 40 homines apprehensi sunt clausaeque septem officinae, ubi oleum premitur.

Scripsit