FERROVIA ANTHOZOIS VEHENDIS?

Quid sibi vult photographema istud supra? Putares picturam monstrare effectum infortunii cuiusdam ferroviarii? Nullo modo. Hic est unus curruum, qui in civitate Neoeboracensi (New York State) per nonnullos denos annos vectores in et ex tribu Manhattan, ubi munera sunt multis incolis suburbiorum megalopolis maximae US-Americanae, cottidie vehere solebant. Nunc autem ob vetustatem de cursu cotidiano remoti in navem sunt ponendi, qua portabuntur usque ad litus Atlanticum civitatis Delaware. Illic, in fundum maris proiecti, fundamenta constituant artificialis corallieti anularis atque, ut sperant oceanologi Americani, mox anthozoa (corallia), plantas marinas necnon humanos urinatores ad novam inexspectatam hic structuram alliciant. Quarum curarum effectus talis esse speratur:

Scripsit ST