Aschersleben ex oppido Saxoniae Anhaltinae – Ditmarus (Dietmar) Reisky director therotrophei Ascherslebeniani: "Consternati" inquit „sumus. Nescimus explicare, quare hic tigris impetum fecerit. Hi tigres non solent esse tam pugnaces."

Ditmarus director rettulit quendam therotrophum ante infortunium per errorem aperuisse falsum repagulum versabile, ut Tania tigris femina perveniret in saepta alborum tigrium Bengalicorum. Deinde Karimum marem duos annos natum in Taniam dominam tigrem duodeviginti annos natam invectum eandemque gulâ morsâ necavisse.

Ditmarus: "Karimus" inquit „videtur statim se proripuisse in Taniam. Necesse est hoc factum esse per momenta tantum temporis, tigres ne semel quidem rugiverunt".

Paria felidarum coniugum Ascherslebiae solent coli ab aliis segregata. Tania undeviginti annos nata iam diu ibi vixerat unâ cum Puhdy marito suo, sed tigres illi albi nuperrimê demum venerunt in therotropheum Ascherslebianum: Medio anno 2006 (bis millesimo sexto) Kiara, quae hodie aetate est duorum et dimidii annorum, e Francogalliâ Ascherslebiam apportata est, mense Iunio a.2007 (anni bis millesimi septimi) secutus est Karimus hodie duos annos natus, qui natus erat in exotico viridario Rhenano-Vestfalico. Therotrophi enim Ascherslebeniani his unicis tigribus Germaniae orientalis albis volunt prolem propagare. Num hoc inceptum nunc in dubium vocetur et quid therotrophi Ascherlebeniani acturi sint de felidis, a Ditmaro directore dicitur adhuc incertum esse.

Tigres albi, qui in feris regionibus raro inveniuntur, hodie coluntur atque propagantur in therotropheis. Eorum pellis est colore eburneo vel albo, typicis virgis tigrium nigro-fuscis. Qui felidae extraordinarii oculis sunt caeruleis, qui, si tigres albi excitantur, ut pupillae dilatentur, transeunt in colorem flaveolum.

Causa pellis albae est duplex mutatio genetica, quae non fit nisi semel in decem milibus partuum. Tigris albus non paritur nisi ambo parentes sunt geno insolito huius coloris. Causis nondum investigatis hoc genum videtur non inveniri nisi in tigribus Bengalicis.