COQUUS SERBICUS PRAECEPTA DAT TESTICULOS COQUENDI

Genitalia re vera saporifera fieri possunt!

Primus in mundo liber coquinarius, qui doceat modos testiculos coquendi, scriptus ac divulgatus est a coquo Serbico Ljubomir Erovic. Qui Apicius Balcanicus iam 20 annorum experientiam habet in genitalia variorum animalium ad gustum hominum praebendo.

"Sapidissimi testiculi sunt, mea opinione, taurorum, equorum struthionumque, licet certe alii aliter de his rebus sentiant" - dixit diurnariis dominus Erovic, occasione publicationis libri eius. Admittit etiam usum testiculorum suillorum et gallorum Indicorum (gallopavorum) at addit genitalia omnium animalium generaliter saporifera esse, humanis fortasse exceptis, quos numquam gustavisset.

Testiculi - tenet Erovic - multam copiam habeant testosteronis (nimirum!) et a multis incolis orbis mediterranei putantur optima aphrodisiaca esse.

In photographemate supra addito monstratur placenta Neapolitana (pizza) testiculis arietum ornata. Infra autem dantur praecepta ova spongia testiculata coquere:

Eripito venas e testiculis taurinis at ponito in aquam ferventem spatio 2-3 minutarum. Antea potes testicula per nonnullas horas macerare in vino rubro. Dein addito testicula ovis spongis more solito in libum commixtis.

Scripsit Stanislaus Tekieli