De cuniculo olivis condito

Vere incipiente pinguia fercula hiemalia relinquenda sunt: longe facilior ad concoquenda est caro cuniculi, suaviore sapore si ab agricola bestiam naturali esca altam tibi comparare possis. Vobis hoc praeceptum culinarium ex Italia meridionali propono.

Tibi compara: cuniculum sesquichiliogramma pondo, duas coepas, sesquihectogramma nigrarum olivarum, dimidium poculum destillati vini (brandy), rosmarinum, thymum, unum circiter decilitrum olivi, dimidium litrum iuris bovillae, sal et piper.

In partes cuniculum reseca, sale et pipere condi et in ollam cum oleo pone, caleface saepe revolvens, deinde caepas et aromata superadde; paulo post destillatum infunde et exspecta, dum evaporet. Caute commisce, ius infunde et operculo superposito per sesquihoram moderato igni coque. Olivas superadde, coctione fere perfecta. Ferculum convivis calidum praebe, qui vinum roseum odoratum sicut Alti Athesis Lagrein aut Aprutinum Montepulciano Cerasuolo laete simul bibent.

Scripsit Herimannus Novocomensis