EPHEMERIS

Annus
2 0 0 8

10 SCANSIO X-RADIARIA

Faciem Tutanchamuni esse restitutam

Îdem rex aetate puerili thronum insedit, iuvenili mortuus est: Sorte Tutanchamuni per saeculum ferê multi homines plurimum commoti sunt. Nunc scientistae computatro restituerunt faciem pharaonis.

Facies Tutanchamuni restituta: Tres greges scientistarum, tres imagines persimiles

Haec actio sumptuosa ubique terrarum a diurnariis est celebrata: Primum omnium, ex quo inventa est a Howardo Cartero archaeologo Britanno, +mumia Tutanchamuni exempta est e conditorio sepulchrali. In tomographo computatrali hôc anno ineunte facta sunt milia septingenta graphemata corporis mortui. Iam nunc constant conclusiones praecipuae: Pharao iuvenis tempore regnandi brevi finito 19 (undeviginti) tantum annos natus mortem obiit, sed adversus hypotheses priores non est occisus.

Nunc Cairo in urbe administratores antiquitatum Aegyptii publicaverunt imaginem scansione x-radiariâ effectam: qua monstratur, qualis fuerit aspectus rêgis viventis. Tres enim greges investigatorum unus alii prorsus non obnoxii Francogallicus, Aegyptius, US-Americanus modernis methodis forensibus restituerunt faciem Tutanchamuni, qui mortuus est 1323 (mille trecentis viginti tribus) annis ante Christum natum.

TUTANCHAMUNUS: FACIES PHARAONIS

Imago computatralis: Cadaver Tutanchamuni CT-scandimento perscrutati investigatores computaverunt, qualis fuisset facies huius rêgis.

Effectus coloris: Formâ faciei restitutâ technurgi faciei indiderunt pigmentum pharaonis.

Ecce conspectus temporis transacti: Talis ferê fuit aspectus Tutanchamuni, qui mortuus est aetate undeviginti annorum.

Aspectus pharaonis: Tres greges investigatorum Francogallicus, Americanus, Aegyptius unus ab alio non dependens studuerunt faciei restituendae. Eorundem restitutiones inter se fuerunt persimiles, parvae tantum differentiae apparuerunt in restituendis naso auribusque.

Calvaria pharaonis *mumificata: *Mumificatores usi sunt uncis, quibus per nasum extraherent cerebrum.

Aspectus calvariae lateralis: Investigatores quaerunt, quare hic pharao tam negligenter sit mumificatus.

Nonne factum est homicidium? Archaeologi calvariam CT-scandimento perscrutati nullum invenerunt indicium, quo probaretur rex mortuus esse violenter.

Amenophis IV. (Quartus), pater Tutanchamuni, loco deorum traditorum ponit ens unicum supremum - deum solis, quem appellat Aton. Inde pharao appellatur Echnaton, i.e. „qui placet deo solis".

Ecce ornamentum veteris Aegypti pretiosissimum: Illustris Tutanchamuni persona mortuaria

Conspectus calvariae frontalis: Tomographiâ computatrali mumia potuit explorari exactissimê

Tubo inferatur: Zahi Hawass archaeologus Aegyptius mumiam imponit tomographo computatrali.

Imago x-radiaria calvariae Tutanchamuni: In superiore capitis parte dimidiâ sinistrâ inventum est parvum ossis fragmentum.

+Mumia perquiritur: Investigatores usque nunc nesciunt, qua causâ Tutanchamunus mortuus sit.

Omnes investigatores invenerunt faciem viri iuvenilis, labiis plenis, auribus a capite paulum distantioribus. Scientistae nuntiaverunt singulos greges quoad formam faciei, positionem oculorum, calvariae proportiones ferê omnino inter se consensisse. Tantummodo summum nasum summasque aures in imaginibus aliquantulo inter se distulisse.

Hanc relationem d.10.m.Mai. a.2005 h.16.24 in periodico interretiali „Spiegel online" editam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/

Scripsit Nicolaus Gross

Retro ad:

Novissima editio
Summum paginae