De christianis Indiae

In re publica ubi duae armatae nimietates, videlicet muslimorum et hinduistarum, cruorem effundere pergunt, soli violentiam reiciunt: dissensiones religiosae minime intermittuntur a Mumbaia usque ad Orissam.

Aggressio tromocratica Mumbaiae tum facta est, cum christiani Indici adhuc ab hinduistis Orissae (unde imago adposita) et in aliis regionibus vexabantur. Paulum differt victimarum numerus: centum et nonaginta circiter uno die in capite oeconomico Indiae, saltem centum et duodeviginti Orissae recentissimo spatio trimestri, etsi sunt qui de quingentis loquuntur, centeni sauciati, templa christiana diruta, domus incensae, multitudines profugorum.

Apud Indos parvulus grex christianorum, pressus inter nimietates religiosas muslimorum et hinduistarum, hoc differt, quod a violentia abhorret et ab auctoritatibus tantum defensionem frustra poscit. Etiam communitatis mundanae auxilium debilis et oscitans videtur; nullum est a ceteris christianis adiutorium victimis tam Indicis quam alieniginis eiusdem religionis fidelibus. Die XXVII mensis Novembris, dum tromocratae Mumbaiae impetum faciunt, pontifex Benedictus XVI iterum libertatem duarum sororum poposcit apud fines Keniae et Somaliae a manipulis muslimis ereptarum eodemque tempore Cairi decem milia mahometani impune templum christianum coptum orantium plenum propterea adorti sunt, quod aedem cultui dicatam extruxerant.

Mumbaiae sinum, deverticula sumptuosa, advenas occidentales (Americanos Britannos Judaeos) adorti, aggressores muslimi se totius orbis oculis quam apertissime subiecerunt: usquequaque omnia perturbata sunt. Non est tamen neglegenda violentia inter communitates religiosas qua cotidie regio Indica affligitur, praecipue dissensiones increscentes inter muslimos et hinduistas.

Non tantum in India vexantur christiani, cuius incolae in ordines divisi sint, sed etiam in aliis nationibus multas ob causas perfractis, etiam religionis causa. Quantum verbi gratia alii aliter martyrii notionem sentiunt! alii vitam gratis oblatam, alii arma mortifera. In orbe excruciato christiani in India innocentes mulcatae victimae fiunt, in Iraquia soli armis carent ideoque crebrissimas persecutiones patiuntur, in infelicissimis recessibus sicut in Somalia soli miseris subveniunt, postquam ceteri aufugerunt.

Hoc scriptum Alexandri Magister, quod apparuit die XXIX mensis Novembris in actis interretialibus Italicis "La repubblica", in linguam Latinam conversum est.

Scripsit Herimannus Novocomensis