Miria Makeba

Die X mensis Novembris Miria Makeba Castri Vulturni mortua est, celebris cantrix Austroafricana: Castrum Vulturni parvus vicus est a Neapoli non longinquus, ubi societates latronum "camorra" vocatae saevire solitae sunt, recenter scriptori animoso Roberto Saviano minitantes. Cui voluit mulier aestimationem et amicitiam spectaculo et cantibus patefacere, ut omnes qui contra scelestorum facinora resistunt se recipiant.

Miria Makeba Johannisburgi, in maxima urbe Africae Australis, die IV mensis Martii anni MCMXXXII orta, Praetoriae arti musicae studuit. Mox canere coepit, numeros bantuenses renovatis modis Americanis, praecipue "rock'n'roll" and "blues", contaminans et in nigricolorum rebellionis symbolum convertens itaque totum per orbem cantus suos circumferens. Tantum metum cantrix rectoribus patriae suae iniecit, ut anno MCMLXIII aqua et igni interdicta sit eiusque phonodiscos mercari aut audire vetitum sit. Deinde per Europam et Americam peragravit, artem suam perficiens et notissimos cantus creans sicut "Pata Pata" "The Click Song" et "Malaika", posthac in Guinea vixit, ubi sola filia eius obiit, demum in Europam rediit. Anno MCMXC Nelson Mandela e custodia liberatus Miriae suasit, ut in patriam suam reverteret. Magnopere gavisa est, cum seiunctioni phyleticae finis impositus est.

Anno MMV deliberavit se palam offerre desinere, aegritudinis causa. Interdum nihilo minus recentibus annis palam cecinit, sicut die illo autumnali quo, febri correpta discalceata, scriptori animoso, qui librum contra scelestorum minitantium machinationes scripserat, amicitiam patefacere voluit.

Scripsit Herimannus Novocomensis