Exercitus Britannorum canis scrutatorius nomine Sadie nomismate honoratur, quod vitam multorum sine dubio servasset, inveniens pyrobolum ad displosionem paratum, qui latebat in refectorio militum in Afghanistania stipendia merentium.

Iaponica fabricatrix automobilium Honda monstrat novum sui inventum, quod in ambulando scalasve ascendendo hominibus veteribus haud parvi adiuvaminis esset. Etiam operarii, qui in officinis stando opus faciunt, hoc instrumento sine dubio uti volent.

Hic ager papaveris in memoria tenetur militum Legionis Britannicae, qui in pugnis primi belli mundani in Belgica vitam amiserunt. Re vera sunt haec papavera, quorum numerus est plus septuaginta milibus, chartacea ac cuique inscibuntur eptistolae amicorum aut propinquorum mortui.

Fiji et Hibernia (Irlandia) certabant in ludo semifinali harpasti in certamine Scyphi Ligationis Mundanae Follis Ovalis anni 2008, in Australia habito. Insulares Pacifici vicerunt Hibernos proportione punctorum 30:14.

In multis regionibus Germaniae undecimus dies mensis Novembris (11 XI) significat initium temporis hiemalis Saturnaliorum, sive "quinti temporis anni", qui tempus valebit usque ad Mercuriam Cineram. Numerus undecim enim a populo stultis cordi esse creditur.

Remiges Cambodiani naves draconeas quantocius currere agunt per undas fluminis Tonle Sap ad Palatium Regale tempore Festi Aquae in urbe capitali Cambodiae, Phnom Penh.

Quale est onus victoriae? Trium, puto, litrarum cerevisiae triticeae Bavarorum. Ecce bicyclistae (sive birotarii) Germani Robert Bartko (a dextra) et collega eius Iljo Keisse (a laeva) huic oneri subeunt Monachii, postquam certamen sex dierum vicissent.

Scripsit ANL