Acroteriopoli ex urbe – Propter defectum luminis postici Rianus (Riaan) Grange lucro commercii privatus est: Astyphylaces enim, cum autumno anni proximi in Africae Australis illustri Viâ Hortensi⁴ Rianum minus autoplaustrum⁵ gubernantem brevi ante Sinum Concharum⁶ nutu seorsim abduxissent – oculis forte in plaustri aream onerariam⁷ apertam coniectis ibidem invenerunt 12.302 (duodecim milia trecenta duo) haliôtidum, neglegenter tantum stragulo abdita. Tales cochleae marinae sunt marinus cibus delicatus unus ex omnium mundi pretiosissimis – itaque in Africâ Australi interim periclitantur, ne emoriantur.

Astyphylaces illi commeaticii in sede iuxta autocinetistam sitâ stupentes invenerunt etiam virum iam pridem sibi nôtum: Eugenium Victorem. Qui a.2004 (bis millesimo quarto) Portu Elisabethae⁸ in urbe erat comprehensus, quia secum portaverat 48 (duodequinquaginta) chiliogramma harum bestiarum, quae lêge proteguntur.

In Africâ Australi piscatio haliôtidum raptoria est lucrosissima. Nam haliôtides longitudine esse solent 25 (viginti quinque) centimetrorum, instructae sunt testâ conchoideâ⁹ atque nacrôsâ¹⁰. Cuppedinarii pro hôc cibo tam raro quam delicato solvunt ferê omne pretium. Ne totum genus haliôtidum exstirparetur, in Africâ Australi vetitum est, ne in uno anni tempore plures haliôtides caperentur quam 125 (centum viginti tonnae). At nuper a diurnariis relatum est anno proximo praeterito sôlum Portum Odorum in urbem¹¹ exportatae sunt plus 2000 (duobus milibus) haliôtidum – pro quibus cryptopolae¹² solvunt centum ferê miliones euronum.

Fundatio Helenae Suzman, organisatio iura humana defendendi, commercium haliôtidum illegitimum describit esse „negotium, quo in toto Promontorio Bonae Spei greges sceleratorum, qui associati sunt syndicatibus drogiariis internationalibus lucrantur multos miliones randorum¹³." Petrus (Pete) Britz oceanologus: „Die lucrativo" inquit „piscator raptorius, qui e nave operatur, solet lucrari 30.000 vel 40.000 (triginta vel quadraginta milia) randorum." Quae sunt duo milia septingenti (2700) vel tria milia quingenti (3500) euronum. Fundatio Suzmaniana invênit integros vicos inter Portum Elisabethae et Acroteriopolin involutos esse commercio haliôtidum illegitimo, etiam „ipsos pueros duodecim annos natos, qui lêge a poenâ sunt tuti." Greges haliôtidas rapientes adiuvari et occultari ab astynomis corruptis et teloniariis."

Catervas subintroductorum proelia committere sanguinolenta

Vicus Hawston in promonturio occidentali situs scatet piscatoribus rapacibus. Ibidem, antequam ab astynomis in vincula coniectus est, regnaverat Ernestus Solomons, archipirata catervae „Rooidakkies", quae proelia sanguinolenta committebat cum aliis catervis rivalibus. Fundatio Suzmaniana refert haec: "Ernesti negotia spectaverunt ad commercium drogarum et subintroductionem armorum et pecuniae tutoriae exactionem violentam necnon piscationem raptoriam".

Famosissima autem pirata vel potius piratria Promunturii Bonae Spei est Elisabetha Marx, cui supernomen impositum est "Abalone-Queen", i.e. Regina haliôtidum. Eadem mulier infamis a.2004 (bis millesimo quarto) in oppidulo Hermanus, quod propter balaenas suas in claritudinem pervênit, ad custodiam trium annorum condemnata est; ista archipiratria imperaverat catervae 56 (quinquaginta) piratarum et a Blaineo Lazaro investigatore speciali computatur a Novembri a.2001 usque ad Aprilem a.2002 negotiis haliôtidum illegitimis lucrata esse 6,6 (sex – virgula – sex) miliones randorum – i.e. sescentos sexaginta milia euronum.

Commercium illegitimum disponitur more militari: Ab urinatoribus, qui cochleas capiunt, per „cursores" plerumque minorennes, qui praedam ad lîtus afferunt et autoplaustrarios, qui mercem illegitimam distribuunt usque ad mediatores, qui adeunt exportatores – „isti omnes hac re lucrum accipiunt magnum", ut legitur in relatione Fundationis Suzmanianae.

Esse etiam indicia, e quibus pateat commercia partim fieri mercibus inter se permutandis: haliotidas austroafricanas permutari cum drogis Asiae Orientalis, ubi haliôtidam haberi pro medicamento aphrodisiaco. Praecipuê Sinenses referuntur vehementer empturire haliôtidas illegitimê ex Africâ Australi exportatas. Septimanâ proximâ praeteritâ cum numeri haliôtidum illegitimê Portum Odôrum in urbem Sinicam exportatarum innotescerent, Shaheen Moolla diurnariis ephemeridis "Cape Times" dixit astynomos atque inspectores piscatorios impares esse syndicatibus piratarum perfectê organisatis atque internationalibus impugnandis, qui instructi essent navibus velocissimis atque arte technicâ altiori. Idem Moolla prius fuit unus e praeceptoribus Austroafricani magistratûs piscatorii, hodie est consultor piscariae industriae quaestuosae. Idem: "Interim" inquit „notum est in litoribus Africae Australis piscationem raptoriam fieri facillimê".

Gubernatio austroafricana – postquam ante nonnullos annos operatio, quam appellaverat Neptunum, parum bene successit – novâ operatione, cui nomen imposuit Protectoris denuo bellum indixit praedonibus haliôtidum. Astynomi et teloniarii et vigiles litorales inter se cooperantur, ut tandem superent istas catervas piratarum. In unâ ex manibus audacibus sunt etiam canes, qui haliôtidas odorentur.

Speculatoribus non officialibus mandatum est, ut observata maturê indicarent. „Si" Eugenius Swart praeceptor Protectoris inquit, „illi acceperint indicia, quibus pateat fieri posse raptationes haliôtidum, illi nos certiores facient, ut mittamus manûs nostras audaces". Si necesse est, Eugenio licet niti ipsis militibus nauticis, ut praedones comprehendat. Eugenius Protectoris praepositus superbê: "Iam" inquit „nonnullos piratas comprehendimus". Eugenii enim gregi Protectori a concive certiori facto medio mense Augusto contigit, ut ante Insulam Phocarum¹⁴ in vincula conicerent tres piscatores piraticos.

At etiamsi iudices Austroafricani denique condemnant raptores haliôtidum, poenae saepe sunt stupendâ clementiâ. Ita iudex nomine Deon Bender Ignundum Welgemoed virum 55 (quinquaginta quinque) annos natum in piscatu raptorio flagranti deprehensum ad custodiam duodecim mensium in probationem damnavit. Quidam vir rei peritus: "Verisimile est" inquit „istum iam pridem redintegrasse negotium suum piraticum".

Tamen interim nonnulli cives Africae Australis videntur coepisse de hac re aliter cogitare. Itaque ecclesiae, administratores communitatum, gubernationes provinciarum, greges civium initiativi volunt curare, ut fama vici Hawston desinatur obscurari a haliôtidum subintroductoribus praedonibusque gregalibus et visatur a philotheorîs peregetîsve¹⁵. Ut incolae intellegant philotheôriam oecologicam¹⁶ fieri posse tam lucrosam quam piscatum raptoriam et scelera gregalia.