Francofurto Moenano ex urbe – Tumultus in aeroplano factus: Duae epibatae mulieres Britannae iter voluptarium facientes tam barbaricê se gesserunt, ut aeronauarchus ex improviso consilium caperet aeroplanum Francofurti appellere. Aeroplanum ex insulâ Graecâ, cui nomen est Cos, revolabat Mamuchium (Manchester) urbem Britannicam.

Eaedem mulieres praeter alia comitem aeronauticum violenter petiverant lagoenâ vodcae necnon conatae erant ianuam aeroplani aperire. Qui conatus periculosus factus est in altitudine 10.000 (decem milium) metrorum, tempore diei Veneris postmeridiano, supra Austriam, postquam hospita aeronautica recusavit, quin pergeret illis mulieribus dare potulenta alcoholica. Ambae illo tempore iam apparuerant esse inebriatae. Ministris aeriis denique contigit, ut has mulieres, quae sunt aetatis viginti sex et viginti septem annorum, cogerent sedibus suis residere.

Deinde aeroplaniga Francofurtum appulsit, ubi temeratrices quietis traderentur astyphylacibus. Probâ factâ apparuit unius Britannae sanguinem esse portione alcoholis 1,3 (unius – virgula – trium), alterius 1,8 (unius – virgula – octo) partium millesimarum. Nunc ambabus imminet causa propter violationem corporis periculosam necnon commeatûs aerii perturbationem. Iisdem Britannis mulieribus interim permissum est, ut pergerent redire in patriam.

Fortasse fiet, ut mulieribus solvenda sit pecunia permagna. Societas enim nautica annuntiavit se postulaturam esse sumptus appulsus intermedii improvisi.