Londinio ex urbe – Andreas (Andrew) Thornton tribus diebus consumpsit denas litras aquae frigidae, ut sopiret gingivam suam dolorosam. Nam idem vir 44 annos natus ab ephemeride „Daily Mail" refertur recusavisse, ne sumeret medicamenta.

Andreas incola Bradfordii oppidi Anglici, qui officium gessit repositoris (orig. Lagerist), therapiâ Draconêâ per triduum adhibitâ denique collapsus in nosocomîum est illatus. Cum Andreas titubaret neque iam distinctê loqui posset, primo medici putaverunt eundem esse inebriatum.

At reverâ haec symptomata effecta sunt cerebri intumescentiâ, cuius ipsius in causâ fuerunt consumptus aquae exaggeratus necnon corporis elutione immoderatâ. Postridie Andreas animam efflavit.

In auditione iudiciali ad hunc casum pertinente, qui factus est mense Decembri proximo praeterito, nunc affirmata est causa mortis officialis „infarctus myocardii consumptu aquae immoderato effectus".