SPONSIONES FACIENDO RES PESSUM ITURAS SOCIETATES COLLOCATORIAS LUCRUM APPORTANT

Tempore egestatis divites fieri

Crisi hypothecaria ubique fere terrarum saeviente, iam non tantum argentarias US-Americanas laedente, sed etiam alias corporationes (General Electric, Alcoa), aut regiones (urbs Arctica Narvik Norvegorum), aut civitates totas (Islandia, Irlandia, Hispania), quarum ratio acceptorum et expensorum magna ex parte e novis creditis pendet, his omnibus rebus horribilibus quasi non praesentibus inveniuntur societates commerciales, quae ultimo in tempore haud parvum lucrum reportant - nuntiat diurnarius Jenny Anderson pro ephemeride "International Herald Tribune" scribens.

Aut potius: immo propter omnes illas res horribiles, quae in oeconomia globali evenire videntur, eae societates lucrum acceperunt, sunt haec enim societates collocatoriae (ut Credit Opportunities Funds a Johanne Paulson conditae, Harbinger Partners Philippi Falcone sive Quantum Endowment praeclari Georgii Soros), quae ante unum aut duos annos sposiones fecerunt mercatum immobilium in USA mox pessum iturum. Quod tunc nemo fere - societatibus supradictis exceptis - crederet, nunc tamen verum esse realitas amara monstrat.

Duae primo supradictae (Credit Opportunities I et II) proximo praeterito anno (2007) reditum reportaverunt 590 et 353 centesimarum; si scilicet mille dolariorum iis anno 2006 exeunte credidisses, nunc apud Credit Opportunities I haberes fere sex milia (5.900 USD) et apud alteram societatem Credit Opportunities II ex eodem pecunia haberes 3.530 dolaria. Minora redita reportant societates Falconaria et Sorosiana, sed etiam haec lucrum producunt tempore cum omnes aliae fere societates commerciales incurrunt damna.

Quarum societatum moderatores hodie dicunt se iam anno 2001 conspexisse res malas in oeconomia Americana adventuras.

Scripsit Stanislaus Tekieli