Annus
2 0 0 8


21

d.21. m.Mart. a.2008, h.14:43

MOLESTATIO INSIDIOSA

Magistram praesidenti Francogalliae mittere crepundia venerea – astynomos investigare

Per menses quaedam magistra Francogalla Nicolao Sarkozy praesidenti Francogalliae misit amatorias epistulas ardentissimas necnon fasces cursuales, cui inerant res lasciviores – cum ille non respondisset, magistra praesidenti est minata.

Lutetiâ ex urbe Parisiorum - "Corpus meum vocat te". Haec verba praesidenti Francogalliae scripta sunt a magistrâ, quae habitat in viculo prope urbem Dunkerque (Theod. Dünkirchen) sito. Ex anno ineunte haec mulier amorabunda misit complures epistulas huiusmodi amatorias – postea fascibus suis cursualibus subiunxit crepundia venerea.


Praesidens Nicolaus Sarkozy:
Magistra despecta Nicolao minata est.

Cum Nicolaus praesidens non responderet, amatrix fascibus epistulisque inscripsit verba minacia qualia sunt „vehementissimê displosivum" et „anthrax" et „nitroglycerinum". Deinde astynomi ab ephemeride "Nord éclair" referuntur rem suscepisse investigandam. Itaque magistra in commissariatu Dunkerquensi ab astynomis est interrogata. Tum eadem mulier ab ephemeride scribitur ibidem lacrimis profusis confessa esse facinus suum. Secundum fontem illius ephemeridis non nominatum magistra amore furiosa dixit se denique verba minacia involucris non inscripsisse nisi ut Nicolaus praesidens minister rerum internarum quondam animum attenderet ad se ipsam.

Eadem mulier interrogata cum esset, est dimissa – ex eâdem nullum imminere periculum. Ephemeride autem refertur actor publicus mandasse, ut veneratrix praesidentis exploraretur a psychiatro.

Hanc relationem d.21.m.Mart. a.2008 h.14.43 in periodico interretiali „Spiegel online" editam (titulus originalis: „Stalking – Verehrerin schickt Sarkozy Sex-Spielzeug – Polizei ermittelt") e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/

Scripsit Nicolaus Gross



Retro ad:

Novissima editio
Summum paginae