Gerdecio ex oppido Albaniae – Prima, ingens detonatio facta est horâ duodecimâ meridianâ, deinde oppidum Gerdecii prope Tiranam urbem situm per horas iterum iterumque novis displosionibus percussum est. Vespere nondum cognitum est, quanta calamitas facta sit. Locutrix gubernationis dixit in officinâ destructâ fortasse esse 63 (sexaginta tres) homines mortuos. Sed magistratûs timent, ne numerus mortuorum sit multo maior. Porro dictum est ducentos homines esse violatos.

Displosionibus aliquot centum domûs sunt destructae. Etiam res multo maiore distantiâ a loco infortunii sitas vehementer esse afflictas. Detonationes auditae sunt usque ad Skopje caput Macedoniae plus 200 (ducentis) chiliometris remotum.

Usque nunc affirmata est mors quinque hominum, inter quos sunt etiam parvuli – mediatores locales rettulerunt de sex hominibus interfectis. Sali Berisha dux gubernationis locutus est de "magnâ tragoediâ" et "mortuis numerosis".

Vespere Berisha coram diurnariis dixit hoc mâne nullos extraneos operatos esse in pyrobolêo. Antea quidam opinati erant inter homines interfectos esse etiam cives Civitatum Unitarum, qui in officinâ dediti essent destruendis pyrobolis vetustate inutilibus.

Magistratûs Albaniani coniciunt displosionem eo effectam esse, quod pyroboli destruendi incautê tractati essent. Magistratûs cives adhortati sunt, ut violatis donarent sanguinem. Multi violatorum in viâ inter urbes Tiranam et Dyrrhachium sitâ autocinetis pyrobolêum praetervehentes displosionibus correpti erant. Omnes homines regionem intra septem chiliometra incolentes allati sunt in locum securum.

Gerdecium versus septentrionem decem chiliometris abest ab urbe Tiranâ. Etiam e vicis circumsitis incolae aufugerunt ex isto incendio infernali. In eâdem regione fluentum electricum est interruptum. Bamir Topi praeses rei publicae cives monuit, ut quietem servarent, ut impedirent „chaos et terrorem Panicum".

Frank-Walter Steinmeier minister Germaniae rerum externarum collegae Albano, cui nomen est Lulzim Basha, eiusque conterraneis telegrammate affirmavit se „medullitus condolere". Steinmeier scripsit haec: "Germania quantum poterit adiuvabit Albaniam hac in horâ difficili".

Berisha dux gubernationis dixit propter pyrobolos a regimine communistico ex anno 1945 (millesimo nongentesimo quadragesimo quinto) reconditos civibus Albaniae imminere periculum continuum. Berisha: "Exstat ibi" inquit „ingens et more insano accumulata copia pyrobolorum. Non excludo hoc infortunium effectum esse errore humano". In pyrobolêo destruebantur pyroboli supervacanei.