29
URSULA MARITIMA
"Floccam" in altores inhiare mordacem
Parvula, sed procacula: Ursula maritima Norimbergensis, quae appellatur „Flocca", therotrophis paulatim fit periculosa. Bernhardus Neurohr veterinarius: Flocca inquit „nunc iam in nos prosilit necnon inhiat nos morsura". Mox altores protegentur chirothecis.
Norimbergâ ex urbe - Bernhardus: "Flocca" inquit „iam mordet sat vehementer". Bracchiis Horstii Maußneri therotrophi iam inesse nonnullos livores. Medicus veterinarius dixit quidem altores a Floccâ, quae interim haberet pondus 9,85 (novem - virgula - octo quinque) chiliogrammorum, nondum terreri, sed annuntiavit eosdem quam maturrimê induturos esse chirothecas longis tutamentis coriaceis instructas.
URSULA MARITIMA NORIMBERGENSIS: EDIT, BIBIT, PALPATUR
|
Therotropha ursulae non appropinquat nisi tutamento orali induta: Ursula maritima ab eâdem penicillo extergetur et manibus leniter tractatur. Ne quae germina nociva inferantur in cellam, cui inest cista lignea Floccae habitaculum, therotrophae induunt vestimenta specialia, gerunt tutamenta oralia et indumenta calcearia...
... et chirothecas semel tantum adhibendas: Ecce parvula puella ursina bellulê crevit.
En ursulam saturam et fatigatam: Intra 48 (duodequinquaginta) tantum horas 15.000 (quindecim milia) hominum commendaverunt, quo nomine appellanda esset haec ursula.
In therotrophio quidem nondum licet hanc ursulam spectare - sed in interreti eadem iam est persona celebratissima. Affluentia spectatorum interretialium ingenti stationes servitoriae (servers) septimanâ exeunte sunt impeditae.
|
Bernhardus affirmat ursulam maritimam duos dimidiumque menses natam saliendo et mordicus inhiando praebere indolem suam rapacem. „Ipso eodem more" Bernhardus inquit „ursi maritimi insiliunt in crustas glaciales, si qua phoca ibidem iacet".
Necesse est, ut Flocca paulatim desuescat cottidianis cenis lagoenariis, assuescat pulti comedendae. Bernhardus: "Decem minutis postquam lagoenulam ebibit Floccae dedimus ultimam lactis mililitram catino metallico infusam, ut elingeret". At ursulae nondum placere hoc genus cibi sumendi.
Medicus veterinarius: "Ad catinum" inquit „illa valdê sollicitatur, magnâ voce clamitat, oportet adhuc assuescat". Aliquantisper exspectandum esse, usque dum Flocca prorsus assuefieret ad novum genus cibos sumendi.
Quod attinet ad auram popularem, oportet Flocca patiatur mox alterum catulum ursinum quoque favorem hominum esse captaturum.
Nam heri nuntiatum est etiam in therotrophio Stutgardiensi prolem ursorum maritimorum esse propagatam. Ibidem mense Decembri natum esse parvulum "Wilbär". Sed îdem ursulus - aliter ac Flocca Norimbergensis - a matre suâ egregiê educatur. „Wilbär" autem, adhuc sex tantum chiliogramma pendens si comparatur cum Floccâ, est nanus levissimus.
Hanc relationem d.29.Febr., h.19.57 a.2008 in Germanico periodico interretiali, c.t. est „spiegel online" editam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/
Scripsit Nicolaus Gross
|
