DRAMA IN THEROTROPHEO ACTUM
DRAMA IN THEROTROPHEO ACTUM
In therotropheo Franciscopolitano spectatorem a tigride esse necatum
En excursionis nataliciae finem tragicum: In therotrophîo Franciscopolitano tigris quaedam, cum e caveâ erupisset, impetum fecit in tres viros spectatores. Unus ex viris mortuus est, bestia sclopetando est interfecta.
Franciscopoli ex urbe - Quomodo fieri potuit, ut Tatiana tigris Sibiriana effugeret e saeptis suis? Die Martis versus horam septimam decimam cum quadrante (17.15 h) certiores facti sunt astyphylaces: Unam minimum tigrem e saeptis erupisse, vagari per therotrophîum - tum bestia rapax iam invenerat victimam suam: in xysto cafêi spectatorum bestia adulta impetum fecit in tres viros.
|
TIGRIS DIFFICILIS: TATIANAE ITER MORTIFERUM
Ecce Tatiana difficilis: Iam anno ante haec bestia in therotrophum invecta eundem vulneraverat. Nunc eidem felidae contigit, ut se e saeptis liberaret et spectatorem interficeret.
Jenkins director therotrophîî respondere debet quaestionibus diurnariorum: Quomodo haec tigris Sibirica potuit e caveâ effugere?
Porta therotrophei Franciscopolitani: Finis excursionis nataliciae tragicus
|
Unus e viris iam ipso in loco infortunii mortuus est, duo ceteri graviter sunt violati. Aetas trium victimarum est inter viginti et triginta annos. Viri violati a medicis nosocomii dicuntur esse statu critico, sed stabili.
Astyphylaces cum advenerunt, tigris modo unum e viris humum deiecerat. Deinde haec bestia rapax invecta est in astyphylaces; qui statim sclopetantes Tatianam interfecerunt.
Felis rapax liberata erat eo tempore, cum modo portae therotrophîî claudebantur. Loca statim sunt evacuata - primo enim therotrophi timuerant, ne omnes quattuor tigres therotrophîî erupissent.
Mense Decembri proximo praeterito eadem tigris momorderat bracchium therotrophi cibantis, ut idem graviter violaretur. Deinde domus bestiarum rapacium in tempus perquisitionis erat clausa.
In hôc therotrophêo Californiae Civitatis Americanae dicuntur coli et tigres Sibirici et Sumatrani.
FRANCISCOPOLIS
Aenigma tigridis in therotrophîo homines aggressae
Ecce homines consternati consiliique expertes, post impetum tigridis mortiferum in spectatorem therotrophîî Franciscopolitani factum: Quomodo fieri potuit, ut Tatiana tigris femina e saeptis effugeret? Perquisitores causam impetûs investigantes ne scelus quidem excludunt.
Franciscopoli ex urbe - Hic casus, qui a directore therotrophîî appellatus est „tragicus", factus est h.17 temporis localis, brevi antequam therotrophîum est clausum. Prima victima ad caveam tigris ipsissimam petita ipso in loco vulneribus morsus gravibus mortuus est.
|
Servatores ferunt victimam tigridis impetum facientis: Duorum violatorum vita a medicis refertur non iam periclitari.
|
Astyphylaces appropinquantes viderunt Tatianam ante cafêum therotrophîî impetum facere in alterum virum, e cuius caput iam sangui effundebatur. Steve Mannina astyphylax ephemeridi „San Francisco Chronicle": „Tigris" inquit „ iterum in illum insiluit". Deinde haec bestia invecta est in astyphylaces. Eidem autem tigrem compluribus glandibus plumbeis prostraverunt. Tum demum astyphylaces invenerunt tertiam tigridis victimam.
Tatiana domina tigris, quae est pondere 160 (centum sexaginta) chiliogrammorum, iam anno proximo praeterito dilaceraverat cuiusdam custodis bracchium. Eadem tigris, cum pabulum praeberetur, brancam suam per crates caveae protenderat. Deinde habitacula bestiarum rapacium clausa sunt usque ad perquisitiones finiendas necnon firmius quam antea munita. Quae nunc circumdata sunt fossâ quinque metra latâ et saepimentis sex metra altis.
Robertus Jenkins director therotrophîî dixit fieri non potuisse, ut Tatiana per ianuam e saeptis evaderet. Ergo necesse esse eandem aut nixam esse trans saepimentum aut trans fossam saluisse. At investigatores noluerunt negare fieri potuisse, ut impetus crudelis efficeretur aut negligentiâ aut ipso consilio scelesto.
Duo iuvenes violati, qui videntur esse par fratrum viro illi interfecto familiare, illati sunt in Generale Nosocomium Franciscopolitanum. Medici bene sperabant illos quamvis vehementer laesos prorsus sanari posse. Ericus Isaacs archiater: "Vulnera" inquit „disponentur et consuentur". Officiales de impetu Tatianae certiores facti primo putaverant omnes quattuor tigres effugisse, sed deinde cum animadverterent ceteros tres tigres non e saeptis effugisse, iidem sunt tranquilliores facti.
Ken Smith locutor siphonariorum: "Hic casus" inquit „nobis Franciscopolitanis est tragicus". Civitatem gloriari de therotrophîo suo. Eidem usque nunc infuerunt duo tigres Sibiriani tresque Sumatrani. Tatiana nonnullis annis ante ab urbe Denver transportata est ad urbem Franciscopolin, ut ibidem cum mare commisceretur ad prolem propagandam. Genus tigrium ubique terrarum periclitatur, ne emoriatur.
_____________________
VOCABULA
archíater, archíatrī m. Theod. Oberarzt; Angl. senior physician, assistant medical director; Fr. médecin en chef; Ital. medico primario; Hisp. médico mayor
(gr. ἀρχίατρος) COD.THEOD.13,3,14; AUG.ep.41,2 e.al.
*astýphylax, astyphýlacis m. Theod. (Streifen)Polizist; Angl.police-man.
*cafēum , -ēī n. Fr./Theod. Café
diurnārius , -iī m. Angl./Theod. Journalist.
COD.THEOD.8,4,8.
*Franciscópolis, -is (acc. -in) f. - orig. San Francisco.
nosocomīum , -iī n. Angl. hospital; Theod. Klinik, Krankenhaus, Hospital.
(gr. νοσοκομεῖον); COD.IUST.1,2,19.
+sclopētāre , -ō, -āvī, -ātum Theod. schießen (+sclopētum, -ī n. Gewehr); Angl. to shoot.
sīphōnārius , -iī m. Angl. fireman; Theod. Feuerwehrmann.
CIL 6,2994.
thērotrophīum, -iī n. Angl. zoo; Theod. Zoo.
(gr. θηροτροφεῖον), VARRO rust.3,13 Apros quidem posse haberi in leporario nec magno negotio ibi et captivos et cicuris, qui ibi nati sint, pingues solere fieri scis, inquit, Axi. Nam quem fundum in Tusculano emit hic Varro a M.Pupio Pisone, vidisti ad bucinam inflatam certo tempore apros et capreas convenire ad pabulum, cum ex superiore loco e palaestra apris effunderetur gla<n>s, capreis vicia aut quid aliud. Ego vero, inquit ille, apud Q. Hortensium cum in agro Laurentii essem, ibi istuc magis θρᾳκικῶς fieri vidi. Nam silva erat, ut dicebat, supra quinquaginta iugerum maceria saepta, quod non leporarium, sed therotrophium appellabat. Ibi erat locus excelsus, ubi triclinio posito cenabamus, quo Orphea vocari iussit. Qui cum eo venisset cum stola et cithara cantare est iussus, bucina inflavit, ut tanta circumfluxerit nos cervorum aprorum et ceterarum quadripedum multitudo, ut non minus formosum mihi visum sit spectaculum, quam in circo maximo aedilium sine Africanis bestiis cum fiunt venationes.
thērótrophus , -ī m. Angl. animal keeper; Theod. Zoowärter, Tierpfleger.
xystus, -ī m. Angl. terrace; Theod. Terrasse.
CIC.acad.2,9; Att.1,8,2; SEN. De ira 3,18,4; PLIN.ep.2,17,17, e.al.
Hanc relationem d.26.m.Dec., a.2007, h.15.28 in periodico interretiali „Spiegel online" editam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/
Scripsit Nicolaus Gross
|
