Brasiliâ ex urbe - Ipsis Brasilianis Saturnalibus ineuntibus ministerium valetudinis coepit distribuere cummes praeservativas. Magistratûs constituerunt, ut usque ad Diem Cinerum, i.e. d.6.um m.Febr., 19,5 (undeviginti - virgula - quinque) miliones condomiorum multitudinibus interspergerentur. Gubernatio hac actione vult impedire, ne fiat contagio morbi sidae morborumque venerearum. Iosephus Gomes (José Gomes) Temporao minister valetudinis: "Nos" inquit „debemus civibus explicare, quantum valeat talium morborum prophylaxis."

Viri ecclesiastici ordinis altioris conati erant prohibere, ne ubique in Brasiliâ distribuerentur condomia neve in urbe Recife distribuerentur pilulae postcoitales. In Brasiliâ vivunt omnium terrarum plerique christiani catholici. Antonius Augustus Dias Duarte episcopus conferentiae episcopalis Brasialianae particeps: "Ecclesia" inquit „non interdicit gaudia Saturnalicia. At nobis non licet tolerare humanae sexualitatis vilificationem (Theod. Banalisierung).

Ministerium valetudinis interrogatione invenit 80% (octogenas partes centesimas) iuvenum virorum uti condomiis, 40% (quadragenas centesimas) iuvencarum a concubis postulant, ut iidem utantur condomiis. Temporao minister valetudinis indicat in Brasiliâ vivere 600.000 (sescenta milia) hominum morbo sida infectorum, e quorum tertia pars medicê curatur. Nuper Nationes Unitae laudaverunt Brasilianorum studia morbum sidam impugnandi. Programmate curationis medicae fit, ut homines sidâ infecti gratis accipiant medicamenta, quibus eorum vivacitas multum augetur.