Berolino ex urbe – Tantulum cervesiae Germani numquam potaverunt: Petrus Hahn dux negotialis Unionis Braciatorum Germanicae ephemeridi „Welt" dixit consumptum singularem trinis partibus centesimis ad 112,5 l (centum duodecim – virgula – quinque litras) deminutum esse. "Annus 2007 (bis millesimus septimus) Germanicae oeconomiae braciatoriae fuit annus malus."

Causae sitis deficientis a Petro Hahn afferuntur tempestas mala et mutatio demographica. Praeterea anno proximo praeterito proventum propter certamen pedifollii mundanum perquam bonum fuisse. Anno 2006 (bis millesimo sexto) ex septem annis primo consumptus cervesiae exauctus erat.

At Unio Braciatorum Germanica non exspectat annis futuris rem meliorem factum iri. Petrus: "Necesse est" inquit „nos exspectemus consumptum cervesiae diutius deminutum iri." Ita fit, ut post breve augmentum anni certaminis mundani 2006 continuetur inclinatio decrescendi, quae iam valet ex annis nonagenariis.

Unio Braciatorum Germanica opinatur venditione deminutâ etiam effectum iri, ut deminuatur multiplicitas bracinarum Germaniae. Petrus quidem non putat braciatores decocturos esse, sed dixit annis venturis bracinas saepius unam ab alterâ receptum aut inter se coniunctum iri: "Experiemur etiam maiorem vim habituros esse magnos braciatorum greges." Unio indicat in Germaniâ exstare 1284 (mille ducentas octoginta quattuor) bracinas – tot bracinae exstant in nullâ aliâ terrâ. At interim a decem bracinis omnium maximis venduntur 70 (septuagenae) ferê centesimae partes cervesiae Germanicae. Necnon haec portio dicitur medio iam temporis spatio transacto valdê exauctum iri.

______________

*brāciātor, -ōris m. – Angl. brewer; Fr. brasseur; Theod. Brauer. - brācīna, -ae f. – Angl. brewery; Fr. brasserie.; Theod. Brauerei. -