MMVIII, trigesimus annus ante Apocalypsin?

Nonnullis abhinc mensibus, astronomi dum caelum perfectissimis telescopiis collustrant, in magnum asteroidem inciderunt, qui, nisi causa quaedam intercidit, anno MMXXXVIII tanta vi in terram incidet, ut uterque dirumpatur. Idem fere periculum hominus genus ad XXX abhinc annis forte fortuna vitavit, quoniam asteroides, cum ad terram appropinquaret, fortuito tantum deflexit, quantum ad collisionem vitandam necessarium fuit. Si tum conflictatio fuisset, multo minora fuissent damna, quoniam asteroidis moles magna non erat.

Novus asteroides contra, cum multo maior sit, conflictatione facta, astronomorum peritorumque opinione, terram frangeret et comminueret, fragmenta per inane huc illuc vagarentur. Hominum genus, idoneis vitae condicionibus carentibus, statim esse desinit.

Ceterum antiquis temporibus, peritorum sententia, haud raro factum est, ut asteroides magno cum animalium arborumque detrimento in terram ceciderint. Sed multo minores fuerunt mole, quam ob rem incommoda, ut ita dicam, exigua fuerunt. Meteorites ille, qui in media America ad sescenties abhinc annorum milibus cecidit, multa animalia, in quibus dinosauri principem locum obtinebant, exstinxisse dicitur. Hominum genus illa aetate terram adhuc non incolebat.

Periti et vestigatores, si ob cuiusdam astri vin asteroides cursum non flectebit, omnia profecto conabuntur, ut terram vitet et iter suum per inane perficiat et in longinquam caeli regionem perveniat. Ceterum homines, scientia et vestigatione fisi, vel per displosivum vel per alia inventa facient, ut cursum non teneat.

Nos vero, cum impotentes rerum regendarum simus, exspectemus oportet quid rerum conditor nobis destinaverit.

Scripsit Horatius Antonius Bologna