Leyla iterum damnata

Leyla Zana, animosa mulier XLVII annos nata quae iura Curdorum qui in Turcia vivunt iam diu defenderat, decem annorum captivitate condemnata est: quae iam totidem annos in vinculis detenta erat, quod factionis communisticae Curdorum (PKK) particeps esset.

Populus Curdorum, qui in quinque nationibus incolunt, iam diu libertatem et iure et armis poscunt. Nunc mulier ideo condemnatur, quod eiusdem factionis legibus vetitae scripta divulgavisset. Leylae patronus, qui sine dubio provocaturus est, eam loquendi libertate tantum usam esse adfirmavit; se praeterea dicens moleste ferre iudicum sententiam Turciae itineri ad Unionem Europaeam obfuturam esse.

Leyla Zana senatrix anno MCMLXXXXI creata magnum clamorem suscitavit, cum ius iurandum ante omnes etiam sermone Curdo pronuntiavisset; post triennium pars communistica Curdorum senatu expulsa est et extra legem agere coepit. Leyla cum tribus collegis senatoribus in vincula coniecta est, ubi decem annos mansit. Anno MCMLXXXXV praemio iuris humani Sakharov affecta est.Nihilo minus amor patriae iterum Leylae carior libertate visus est.

Scripsit Herimannus Novocomensis