ICTUS TERRORISTICI IN INDIA

Mumbaia sanguine defluit

Mumbaiae, quae metropolis (olim ut Bombai nota) est quasi caput oeconomicum Indiae, die Martis vespero greges rebellatorum islamicae societatis nomine Bellatorum Sacrorum Decanis (Deccan Mujahiddeens) sclopetando adorti sunt septem loca media in urbe. Ictibus illorum saltem 78 homines vitam amississe reportantur, 200 alios vulneratos esse; numeri hi tamen mox auctum iri timentur.

Capta a rebellatoribus sunt duo deversoria luxuriosa - Taj Palace et Oberoi. De pugnis rebellatorum cum vigilibus publicis, quibus mox milites regulares auxiliis advenerunt, nuntiatum est quoque de statione ferroviaria Chhatrapati Shivaji. Multa nocte audiebantur, secundum testes, sclopetatio ac displosiones circa has trinas aedes. Partem Taj Palace nuntiatur incendio captam esse.

Testes oculati narrant in uno deversoriorum rebellatores a ianua ad ianuam cubicula perscrutatos esse, cives US-Americanos Britannosque quaerentes. Hos verisimiliter ut obsides tenere cupiant, sperantes hoc modo cogere Wasintoniam aut Londinium, ut suos milites ab Iraquia Afghanistaniave revocent - dicunt in primis commentariis analytici rerum politicarum Proximi et Medii Orientis.

Scripsit Stanislaus Tekieli