De Thailandiae tumultibus

Turba reclamantium per fora viasque Thailandiae capitis Bankokiae ministri primarii Somchai Wongsawat abdicationem postulant; ante aedes senatorias millia congregata sunt haud longe ab regiminis palatio. Catervae militum et custodum publicorum invigilantes iussae sunt non armis igneis sed scutis tantum et fustibus multitudini resistere. Martis et Saturni diebus militiae turbas tanta cum vi aggressae sunt, ut duo reclamantes interierint, deni sauciati sint. Centum milia oppositorum ante senatum diei Solis vesperi vel postridie conventuri esse putantur. "Dies libertatis erit - ait Chokchuang Chutinaton, unus ex rebellium ducibus - ultimus erit ictus, ut regimen subvertatur."

Foedus Populi Democraticum, factio oppositorum cui et monarchiae defensores et urbium incolae bene constituti et operariorum societates favent, suffragia ita haberi censent, ut pauperum rusticorum consensus quam facillime pecunia comparentur. Praeterea minister primarius accusatur, quod in vicem agat propinqui sui Thaksin Shinawatra, qui Thailandiae rectoris supremi munere usque ad annum MMVI functus erat, dignitate spoliati quod gravia scelera perpetrasset.

Ambo consilia senatoria lunae die mane convocata sunt, sed arduum est providere, utrum conventus dicti habendi sint an non.

Scripsit Herimannus Novocomensis