Annus
2 0 0 8


Obama praesidens

Obama praesidens

Senator democraticus Baracus Obama praesidens Civitatum Americae Unitarum creatus est, primus nigro colore. Cum primum pro certo habuit se partem maiorem electorum consensuum adeptum esse, cum nondum in Europa lucesceret, magno cum gaudio fautores suos Sicagi allocutus est honorem adversario Johanni McCain tribuens et gratias omnibus agens, qui secum acre proelium tulerant, primum uxorem et candidatum praesidentem vicarium.Victoria Baraci nitida est, cum septem milionum electorum circiter distantia inter candidatos fuerit.

Baraco praecipue in civitatibus litoribus Atlantico et Pacifico oceanis tactis et in magnorum lacuum regione suffragia allata sunt; civitates vero meridionales Johanni plerumque faverunt.

Post diuturnas contentiones ad iura obtinenda civium nigricolorum, quorum maiores ut servi ex Africa transvecti fuerant, primum electus est talis praesidens, cuius pater ex Kenia mater albicolor ex Kansia fuerint. Ipse vero in Havaiis anno MCMLXI natus est.Spes commutationis cives Americanos induxit ad candidatum democraticum praeferendum.

Scripsit Herimannus Novocomensis



Retro ad:

Novissima editio
Summum paginae