De supremo certamine

Imminent suffragia praesidentialia: ambo candidati summo cum studio conantur incertis suadere, deinde civibus delectus erit. Democratico Baraco Obama plures favere putantur, nemini tamen rem pro certo habere licet, non solum electionis modis intellectu difficillimis sed etiam propter ambitus pericula.

Johannes McCain in Virginia et Pennsilvania consensus requirit, Baracus Obama in Nivata, Colorato et Missuria; sibi enim quisque magis arduas civitates visitat. Johanni nuper aperte auxilium tulit gubernator Californiae Arnoldus Schwarzenegger, histrio praeclarus, acrem sermonem in Ohio habens: "Diutius Johannes - inquit - in vinculis mansit, quam Baracus in senatu." Ibidem McCain dixit se ad tempus non multo superari, sed consensus augescere: "Appropinquamus, amici, et in Ohio praevalebimus!" Investigatio enim agenturae Reuters quattuor tantum centesimis Baracum praestare rettulit. Qui fautores suos acri pugnae usque ad diem comitiorum incitavit.

Martis die comitia habebuntur, Mercuri die - si di adiuverint - utri victoria contigerit cognoscemus.

Scripsit Herimannus Novocomensis