De comitiis in Israël habendis

Praesidens Israëlianus Shimon Peres ante senatores allocutus nuntiavit novum regimen constitui non posse et ante diem dictam comitia habenda esse. Nam ministra rebus exteris addicta Tzipis Livni dux factionis Kadima - quae in imagine cum praesidente colloquitur - , cui plures sellae sunt, foedus gubernando aptum creare nequiit. Ideo comitia proximo mense Februario habebuntur. "Senatus - ait praesidens - et omnia instituta politica se severe examinare debent. Adhuc nimis sero non est."

Beniaminus Netanyahu, qui partem Likud ducit, se putat victorem et ministrum primarium futurum esse: nam duae maximae factiones fere parem consensum accepturae esse putantur. Beniaminus negavit, si ipse contra adversarios praevaluerit, colles Galan Syriacis reddendos, Hierosolyma partienda esse. De statu enim urbis sanctae acriter disputatur, quod Palaestini insulas orientales caput patriae nationis suae creandae fore velint. Propterea non potuit Tzipis Livni regimen constituere, quod factio Shas nollet de urbis statu disputare. Observatores tamen putant nihil pactiones profuturas esse, nisi de statu Hierosolymorum saltem colloquia coeperint.

Scripsit Herimannus Novocomensis