Annus
2 0 0 8


De pacta in Zimbabvia neglectis

De pactis in Zimbabvia neglectis

Neglectis pactis mense praeterito subscriptis, praesidens Zimbabviae Robertus Mugabe constituendi regiminis munera maximi momenti parti suae tribuit, id est ZANU-PF. Hoc detulit Morganus Tsvangirai, dux factionis MDC ad quam plurimae sellae iuxta conventum pertinent.

Quamquam minister Roberti sodalis Bright Matonga Saturni die partitionem aequam esse proclamasset, nuntius MDC Nelson Chamisa indicem nuper paratum "iniquum superbum contumeliosum" appellavit et praesidentem Africae Australis Thabonem Mbeki ut conciliatorem secundo invocavit. "MDC - ait Bright - istam absurdam rem omnino reicit!". Quae factio custodiae publicae praeesse avet, cum ZANU-PF exercitus imperium contigerit.

Interea condicio miserrima civium, qui inaudito pretiorum auctu laborant, minime melior fit; Ordo Nationum Unitarum CXL quidem miliones dollarorum, id est centum miliones euronum, postulavit ut proximo spatio semestri cibaria minima Zimbabviae egenis incolis afferat.

Scripsit Herimannus Novocomensis



Retro ad:

Novissima editio
Summum paginae